Сунтаарга Строд ыстааба Үөрэҕирии мусуойа буолан турар

9 октября 2018, 17:55

Сунтаар улууһугар Үөрэҕирии мусуойа 2013 сыл ыам ыйын 29 күнүттэн аһыллан үлэлиир. Докумуоннары, экспонаттары хомуйуу үлэтэ сыл инниттэн барбыта.


Мусуой дьиэтэ бэйэтэ туһунан устуоруйалаах. Дьиэ 1916 сыллаахха оскуола быһыытынан тутуллубута. Ону Громов учуутал туруорсан туттарбыта биллэр. Бэдэрээччитинэн Исидор Бекренев буолбут.
Гражданскай сэрии саҕана манна кыһыл хамандыыр Иван Строд ыстааптанан олорбут. 1925 сыллаахха ССРС НА Саха сирин үөрэтэр комплекснай экспедициятын састаабыгар киирэн үлэлэспит уопсастыбаннай диэйэтэл, учуонай, суруйааччы, саха омук интэллигиэнсийэтин биир чулуу бэрэстэбиитэлэ Василий Никифоров-Күлүмнүүр олоро сылдьыбыта биллэр. Ити гынан баран, дьиэ анал статуһа суох эбит.

Сунтаардааҕы үөрэх устуоруйатын мусуойун салайааччы, улуустааҕы үөрэҕирии управлениетын үлэһитэ Альбина Иванова сүүрэн-көтөн тэрийдэ. Кини куоракка национальнай архыыпка ыйы ыйдаан үлэлээн, улуус үөрэҕириитин сайдыытын кэрэһэлиир докумуоннары хомуйбута. Улуус үөрэхтээһинигэр сүдү кылааты киллэрбит дьон олохторун-дьаһахтарын туоһулуур докумуоннары, ахтыылары муспута.

Мусуой 1000-тан тахса экспонаттаах. Сүрүннээн улуус биллэр педагогтара, кинилэр үлэлэрин уопута, дьон ахтыылара бааллар. Оҕолору үөрэтэр араас тэриллэр, эргэ паарта, отутус сыллардааҕы кинигэ арааһа, наҕараадалар…


Төрдүс сылын улуус оскуолаларыттан оҕолор кэлэн, анал уруоктар ыытыллаллар эбит. Ити кэм устата барыта 1200-чэ оҕо кэлэн эрчиллибит. Кинилэр мусуой докумуоннарын туһанан чинчийэр үлэни ыыталлар. Маннык уруоктар сүрүн сыалларынан оҕолорго үөрэхтээһин устуоруйатын билиһиннэрии, учуутал идэтигэр уһуйуу уонна патриотическай тыыҥҥа иитии буолар.
Мусуой буолуон иннинэ манна үөрэҕирии салаатын үгүс тэрилтэтэ үлэлээбит.

Билигин мусуойу сэргэ манна улуустааҕы үөрэҕирии салаатын бибилэтиэкэтэ, архыыба бааллар.
Альбина Григорьевна инники былааҥҥа улуус сэрии иннинээҕи үөрэхтээһинин усуоруйатын сырдатар кинигэни таһаарар былааннааҕын кэпсээтэ.

Ааптар: Гаврил Андреев

Читать оригинал статьи и комментарии на Ulus.Media
$:66
:75
¥:96
$3218.79
в Якутске -25°
завтра -23°