Мэҥэ Хаҥалас эдэр боксуордара Россия түһүлгэтигэр суол астылар

12 октября 2018, 13:37

СӨ үтүөлээх тириэньэрэ Василий Шестаков салайааччылаах Майатааҕы оҕо успуорт оскуолатын буоксаҕа салаатын иитиллээччилэрэ алтынньыттан араас күрэхтэһиилэргэ ситиһиилээхтик кытталлар.


Майатааҕы успуорт осауолатын буокса салаатын иитиллээччилэрэ ики улахан күрэххэ үчүгэй көрдөрүүлэннилэр. Тула куоракка ыытыллыбыт Россия “Локомотив” успуорт уопсастыбатын 2001-2002 сс. төрүөх юниордар күрэхтэһиилэригэр Төхтүр орто оскуолатын үэрэнээччитэ Женя Мартынов 49 киилэҕэ диэри ыйааһыннаахтарга чөмпүйүөн буолла. Женя үстэ ириингэҕэ тахсан Оренбургтан, Москва уобалаһыттан, Дагестантан сылдьар утарылаһааччыларын эрэллээхтик кыайа тутта.

Аны ахсынньы ыйга Санкт-Петербурга буолар Н.А. Никифоров-Денисов кубогын иһин юниордарга күрэхтэһиигэ ыҥырылынна. Күрэхтэһии Россия эдэрдэргэ хамаандатын сүүмэрдиир сыаллаах ыытыллар. Бу түһүлгэттэн саҕалаан Европа, аан дойду күрэхтэһиилэригэр,чөмпүйэнээттэригэр, ону ааһан Олимпийскай оонньууларга тиийэ кыттыан сөптөөх кэскиллээх ыччаттары көрүү быһыытынан тэриллэр. Россия ириингэтигэр ылбычча таһаарбаттар, манна ыйааһын аайы биирдии кыттааччы Федеральнай уокуруктартан уонна Россия араас успуорт уопсастыбаларыттан чөмпүйүөннэр эрэ кыттар бырааптаналлар. Бу күрэхтэһиигэ Женя Мартынов Саха буоксаҕа оскуолатын аатын ситиһиилээхтик көмүскүө, ол туһуттан кэмигэр сөптөөх үп-харчы көрүллүө диэн тириэньэрдэр эрэнэллэр.

Соторутааҕыта 2003-2004 сс. төрүөх уолаттар уонна кыргыттар Покровскайга Саха сиригэр биирдиилээн бастыыр иһин күрэхтэһиигэ кытыннылар. Бу күрэхтэһии ССРС чөмпүйүөнэ, Олимпийскай оонньуулар кыттыылааҕа, аан дойдутааҕы кылаастаах успуорт маастара Анатолий Никитович Филиппов бирииһигэр тэрилиннэ. Хамаанданы тириэньэрдэр Ариан Монастырев, Владимир Петров салайдылар, саҥа үлэлээн эрэр эдэр маастарга хандьыдааттар Александр Дмитриев, Захар Карамзин күүс-көмө буоллулар. Оҕолорбут бу сырыыга 4 мэтээллээх эргилиннилэр. Хара оскуолатыттан Алия Стручкова (48 кг) кыһыл көмүс, Ая Стручкова (50 кг) боруонса, Төхтүртэн Эрик Китаев (44 кг) үрүҥ көмүс, Ян Мальцев (48 кг) боруонса мэтээл хаһаайыннарынан буоллулар.

Судьуйа кэллиэгийэтин быһаарыытынан кыргыттар ортолоругар күрэхтэһии бастыҥ боксуорун аатын Алия Стручкова сүгэн, элбэх аан дойду, Олимпийскай оонньуулар чөмпүйүөннэрин бэлэмнээбит, уруккута Россия сүүмэрдэммит хамаандатын кылаабынай тириэньэрэ, Россия үтүөлээх тириэньэрэ Николай Хромов илиититтэн анал бириис тутта. Урукку сылларга бу күрэхтэһиигэ саамай муҥутаан 2011 сыллаахха Намҥа 4, 2012 сыллаахха Майаҕа 5 чөмпүйүөннээх кыттан турардаахпыт. Ити сылларга Миша Афанасьев, Саша Дмитриев, Айтал Дьяконов, Миша Скрыбыкин, Кеша Плотников, Салоходдин Абдукадыров чөмпүйүөн аатын хастыыта да ылан турардаахтар. Онно тэҥнээтэххэ быйылгы кыттыы түмүгэ сэмэй буолла.

Майаҕа Манчаары аатынан успуорт комплекска анал буокса саалата сыһыары тутуу быһыытынан тутуллан бүттэ. Бу күннэргэ үлэҕэ киирэрин эдэр боксуордар үөрэ кэтэһэллэр. Бу оскуолаттан куорсун анньыммыт успорт үтүөлээх маастара Василий Егоров, успуорт маастардара Айтал Дьяконов, Петр Егоров бу күннэргэ Дьокуускайга буолар Россия чөмпүйэнээтигэр кыттыыны ылыахтара.

Ааптар: Петр Илларионов

Читать оригинал статьи и комментарии на Ulus.Media
$:66
:75
¥:96
$3201.03
в Якутске -26°
завтра -25°