Абаҕалар кинигэлиин алтыстылар

16 апреля 2019, 17:15

К.Туйаарыскай аатынан Абаҕа модельнай бибилэтиэкэтигэр оҕо уонна ыччат кинигэтин нэдиэлэтэ сэргэхтик тэрилиннэ. Оҕолуун, кырдьаҕастыын ааҕыы алыптаах муоратыгар уһуннулар.


СӨ култууратын туйгуна, бибилэтиэкэр Клара Карманова олохтоохторго араас тэрээһиннэри тиһигин быспакка ыытар. Үүнэр көлүөнэ кинигэтин нэдиэлэтэ Саха сиригэр пионерскай тэрилтэ 95 сааһыгар, Россияҕа Тыйаатыр сылыгар уонна Аммаҕа ыытыллыахтаах спортивнай Оонньууларга ананна.

РСФСР уонна Саха АССР үтүөлээх артыыһа, режиссер Ф.Ф.Потапов олоҕор, айымньылаах үлэтигэр бэсиэдэ, Амма улууһугар спорт сайдыытын, гражданскай сэрии дьоруойа И.Я.Строд төрөөбүтэ 125 сылыгар, Космонавтика күнүгэр анаммыт кэпсэтиилэр, викториналар, «Абаҕа айар талааннаах дьоно», «Книга. Театр. Режиссер», «Спорт — это жизнь, это- движение, это — здоровье!» диэн кинигэ быыстапкалара ааҕааччылар болҕомтолорун ыллыллар. Учуутал Ингалина Белолюбская салайар бастакы кылааһын оҕолоро чыычаах уйатын оҥорон бэлэхтээн үөртүлэр. Улахан кылаас оҕолоругар «Квест — игра» диэн оонньууну оскуола бибилэтиэкэрэ Надежда Яковлева ыытта.

Абаҕа нэһилиэгэр 1992 сыллаахха оҕо уонна улахан дьон айар түмсүүлэрэ тэриллибиттэрэ. Олохтоох айар дьон түмсүүлэригэр аан бастаан ааптардар Илья Нектыров, Спиридон Яковлев, Василиса Винокурова, Бранцуска Тимофеева, Пелагея Емельянова, Клания Севастьянова, Гаврил Захаров, Прокопий Карманов, Александра Карманова, Татьяна Антонова о.д.а. кыттыбыттара. Ол кэнниттэн кинигэни ааҕыыттан саҕалаан айар үлэҕэ тахсар таһымҥа туһуламмыт бырайыагынан үлэ барбыта. Оҕолору кинигэ эйгэтигэр умсугуппут салайааччынан ССРС култууратын туйгуна, улуустааҕы «Урамньы» бириэмийэ икки төгүллээх хаһаайына Галина Захарова буолар. Кини биир дойдулаахпыт оҕо тапталлаах суруйааччыта К.Н.Туйаарыскай — Дьячковскай аата 1995 сыллаахха бибилэтиэкэҕэ иҥэриллибитигэр улахан оруоллаах. Айар үлэлэрин хомуурунньук гыммыт уран тыллаах эдэр ааптардар Юрий Гоголев, Ньургуйаана Прокопьева, Туйаара Карманова түмсүү чилиэннэрин үөрдэллэр.

«Нэдиэлэ кэмигэр Абаҕатааҕы айар талааннаах дьонун түмсүүлэрин кытта оҕолор көрсүһүүлэрэ интэриэһинэйдик барда. Аҕа саастаах дьон үөрэнээччилэргэ үлэлэрин билиһиннэрдилэр, айымньыларын ааҕан иһитиннэрдилэр, кинигэни ааҕыы өйү сайыннарарын уонна тулалыыр эйгэҕэ тапталы иитэрин тоһоҕолоон бэлиэтээтилэр“, — диэн кэпсиир Абаҕа олохтоох модельнай бибилэтиэкэтин сэбиэдиссэйэ Клара Карманова.

Ааптар Алтана Артемьева

Читать оригинал статьи и комментарии на Ulus.Media
$:65
:72
¥:93
$7993
в Якутске 11°
завтра 11°