Эбээн-Бытантай улууһун дьахталлара түмүстүлэр

16 апреля 2019, 17:56

«Биһиги сомоҕолоһуу уонна чөл олох иһин» диэн Эбээн-Бытантай улууһун дьахталларын аан маҥнайгы форума улуус устуоруйатыгар суруллан хаалыаҕа. Сомоҕолоһуу сылыгар төрүттэммит түмсүү сыала-соруга кэҥээн, уопсастыба туһугар үлэтэ-хамнаһа сылын аайы сайда турарыгар этилиннэ.


«Эбээн-Бытантай улууһун дьахталларын мөссүөннэрэ» диэн фотогалерея, талааннаах суруйааччы дьахталлар кинигэлэрин уонна уран тарбахтаахтар быыстапкалара үлэлээтэ.

Фотогалереяҕа Эбээн-Бытантай дьахталларын кэрэ мөссүөннэрин көрдүбүт. Суруйар талааннаах кэрэ аҥардартан Фаина Курчатова, Венера Колесова-Чаҕылхай, Наталья Попова, Елена Васильева, Маргарита Давыдова кинигэлэрэ кэчигирэспиттэр. Быыстапкаҕа эбээн норуотун талба талааннаах, кыптыый, иннэ доҕордоох Т. В. Колесова сарыыттан, фанераттан оҥорбут үлэлэрин дьон кэрэхсээтэ. Ону тэҥэ А. С. Сотрудникова, Д. В. Малышева үлэлэрэ, Н. С. Владимирова сахалыы оһуордаах харысхаллара, кыра кээмэйдээх суумкалара, Т. И. Кузьмина баайыы таҥастара, В. В. Колесова коллекциялара турдулар.

Форум эбээн омугун үтүө үгэһинэн дөлбүргэ ыйаан, саха омук сыалаах алаадьытынан эһэкээни аһатыыттан саҕаланна. Кэрэ куоластаах Кустуур кыргыттара Ньургуяна Потапова, Татьяна Старостина бар дьонҥо ылбаҕай ырыаларын бэлэхтээтилэр. Бу кэннэ бука бары дьахталлар сээдьэ эйээркэй доҕоонноругар үнкүүлээн тэйдилэр. Эбээн-Бытантан улууһун аҕа баһылыгын солбуйааччыта Р. Д. Старостина «Инники күөнҥэ биһиги улууспутугар дьахталлар сылдьаллар. Бүгүн биһиги дьахталлар саҥа хайысхалары тобулаары форумҥа муһуннубут. Биһиги улууспутугар эдэр ыаллары дьиэнэн хааччыйыы программата үлэлии турар. Россияҕа ийэ хапытаала эбиллэр, оҕону үс сааһыгар диэри көрөн олорорго пособие бэриллиэ», — диэн тоһоҕолоон эттэ.

Аллараа Бытантай нэһилиэгин баһылыгын солбуйааччыта Н. П. Старостина күһүн “21 үйэҕэ үтүө дьыала” диэн күрэххэ кыттан, саҥа үлэлии кэлэр исписэлиистэргэ 4 кыбартыыралаах дьиэ ыларга грант ылыллыбытын, улуус дьаһалтата бу саҕалааһыны өйүүрүгэр эрэнэрин биллэрдэ. Улуустааҕы дьахтар сүбэтин бэрэссэдээтэлэ Д. В. Малышева: Тулаайах, инбэлиит оҕолорго аһынан-таҥаһынан көмөлөһөбүт. Кырдьаҕас, кыаммат дьону оонньотон сэргэхситэбит. Сайын, күһүн төрөөбүт дойдубут эмтээх отторун хомуйабыт”, — диэн кэпсээтэ.

Үөһээ Бытантай дьахтар сүбэтин бэрэссэдээтэлэ К. Н. Захарова – Стручкова былырыын нэһилиэктэригэр түөлбэ сыла биллэриллэн, көхтөөх үлэ барбытын бэлиэитээтэ. Оттон быйылгы сылга аҕа статуһун көтөҕөр сыалтан Аҕалар сылларын биллэрбиттэр. «Урукку сылларга биһиги нэһилиэкпит тулаайахсыйан иннибитин-кэннибитин билбэккэ олорбуппут. Оттон кэнники кэмҥэ олус сайдан, тупсан эрэбит. Ол биһигини үөрдэр, инникигэ кынаттыыр”, — диэтэ кини.

Аллараа Бытантай дьахтар сүбэтин бэрэссэдээтэлэ Е. Т. Борисова: “Биһиги нэһилиэккэ көхтөөх дьахтар элбэх. Холобура бүтүн Арассыыйаҕа нуучча тылын учуутала Р. Г. Старостина үөрэҕирии форумугар маҥнайгы миэстэни ылан кэлбитэ. Кустуурга олорор кыаммат-түгэммэт дьоҥҥо төһө кыалларынан көмөлөһөбүт”, — диэн иһитиннэрдэ. Оттон улуус депутаттарын бэрэссэдээтэлэ К. В. Бочкарева: «Биһиги улууспут хамаандата Дьааҥыга буолбут «Тымныы чыпчаала» бэстибээлгэ ситиһиилээхтик кыттан кэллибит. Дьааҥылар бастыҥ спортсменнарга, үөрэнээччилэргэ, ырыаһыттарга, үҥкүүһүттэргэ, көхтөөх дьоҥҥо истипиэндьийэ быһыытынан бириэмийэ аныыллар эбит. Кинилэртэн холобур ылыах тустаахпыт», — диэн санаатын тириэртэ.

Эбээн-Бытантай аҕа баһылыга Г. Г. Горохов хас биирдии форум кыттыылааҕар роза сибэкки дьөрбөтүн бэлэх уунан, дьахталлары үөртэ.

Форум иккис аҥаарыгар 4 былаһаакка үлэлээтэ. 1 былаһаакка — «Дьиэ кэргэн уонна социальнай эйгэҕэ көхтөөх буолуу». Модератордар Ф. И. Колесова, Ж. Н. Дмитриева, С. Н. Ермолаева, А. П. Архипова, Д. М. Горохова, Е. Т. Борисова, М. И. Сизых. Кэпсэтии түмүгүнэн резолюцияҕа хас биирдии психолог, социальнай педагог сомоҕолоһон ассоциация тэринэн үлэлииргэ сүбэлэстилэр.

2 былаһаакка — «Бизнес-леди» модератордар: Д. В. Малышева, З. Н. Слепцова, А. К. Степанова. Зарьяна Слепцова “Амвей” бородууксуйагар маркетинг былаанын кэпсээтэ. Бу бородууксуйа доруобуйаҕа, кэрэ буолууга, дьиэ ис-тас өттүгэр туттарга аналлааҕын, саамай сүрүнэ үп аҕаларын уонна тулалыыр эйгэҕэ буортута суоҕун туһунан кэпсээтэ. Бородууксуйатын хас биирдиитин сиһилии хайдах туттарга үөрэттэ, көрдөрдө. Анна Степанова“Аннушка” маҕаһыынын хайдах саҕалаан арыйбытын сиһилии бар дьонҥо кэпсээтэ.

3 былаһаакка — «Чөл уонна кэрэ буолуу бэйэм илиибэр» модератордар: М. Н. Прокопьева, А. В. Антипина, В. В. Колесова, В. Н. Григорьева. Антонина Антипина аныгы ньыманан 3 ый сылдьар уһун кыламан оҥоруутун туһунан кэпсээтэ. Венера Колесова Шонсой гимнастиканы көрдөрөн, саастаах дьон эттэрин-хааннарын уһугуннарда. Виктория Григорьева сертификаттаах массажист маастар-кылааһа ордук интэриэһинэй буолла. Кини илиитин иминэн киһи туох ыарыылааҕын энчирэччи билэр буоларга үөрэммит. Киһи көхсүттэн кумах, туус тахсыар диэри илбийэн эмтиир эбит. Кини моойу, көхсүнү сөпкө хайдах массажтыырга үөрэттэ.

4 былаһааккаҕа — «Уран тарбахтаах дьахталлар искусстоволара» модератордар: А. З. Аммосова, Нь. Е. Колесова, Т. В. Колесова, Т. А. Жиркова, Т. И. Кузьмина. Айсана Аммосова оҕуруонан киэргэтэн ободок оҥоһуутун көрдөрдө. Кырыйар, тигэр дьоҕурдаах Туйаара Колесова маһынан оһуор быһарга үөрэттэ. Ньургуяна Колесова, Татьяна Жиркова оҕуруонан эбээннии оһуор ойуутун тиһэри көрдөрдүлэр. Татьяна Кузьмина баайыы кистэлэҥин арыйда. Уран тарбахтаахтар бары түмсэн үлэлииллэрин курдук улууска Ателье тэриниэххэ наадатын туһунан норуот маастардара баҕа санааларын эттилэр.

«Дьахтары уруйдаан!» диэн түмүктүүр дьоро киэһэ буолла. Улуустааҕы культура дьаһалтатын салайааччыта Л. С. Сыроватская уран тарбахтаах Антонина Афанасьевна Слепцоваҕа «Норуот маастара” үрдүк аат иҥэриллибитин туттарда. Ылбаҕай ырыаһыттартан Илья Колесов, Александр Ефимов, Ньургуйаана Потапова,Нарыйаана Колесова, Иван Горохов, Татьяна Старостина, Татьяна Жиркова дьоро киэһэни киэргэттилэр. «Айылгы» эдэр ийэлэр, “Генулчан”-орто саастаахтар “Холумтан” эбэлэр ансаамбыллара ыллаатылар-туойдулар.

Форум түмүктэниитэ сулумах сылдьар дьахталлары, эр дьону холбуур кулууп тэринэр тоҕоостооҕун, үлэтэ суох ыал ийэлэригэр үлэ булалларыгар көмөлөһүү, дьахталлар форумнарын сыл аайы ыытыахха наадатын туһунан резолюцияҕа эттилэр.

Ааптар: Оксана Апитова

Читать оригинал статьи и комментарии на Ulus.Media
$:63
:71
¥:91
$9720.14
в Якутске 17°
завтра 14°