Үөһээ Бүлүү үөрэҕин салалтата бырабыыталыстыба 202 дьаһалыгар санаатын эттэ

16 мая 2019, 10:12

​Саха Өрөспүүбүлүкэтин бырабыыталыстыбатын 202 нүөмэрдээх 2018 сыл бэс ыйын 6 күнүнээҕи дьаһала тахсыбыта. Үөһээ Бүлүү улууһун үөрэҕин управлениетын салайааччыта Спиридон Борбуев докумуоҥҥа баар үөрэх эйгэтин боппуруостарыгар быһаарыы биэрдэ.


​Үөһээ Бүлүү улууһун үөрэҕин эйгэтин салайааччыта Спиридон Борбуев этэринэн, интернет ситимигэр бырабыыталыстыба дьаһалын туолуутугар сыһыаннаах испииһэк күүлэйдии сылдьар.

— Куйаарга күүлэйдии сылдьар докумуоҥҥа испииһэккэ киирбит тэрилтэлэр сүһүөхтэрин аччатар эбэтэр атын үөрэх тэрилтэтигэр холбонуон сөптөөхтөрө ыйыллар. Бу испииһэккэ дьаһал ирдэбиллэрин кэккэ туһаайыылара болҕомтоҕо ылыллыбатахтар, ол эбэтэр, нэһилиэнньэ ахсаана, суола-ииһэ учуоттамматах, сүрүннээн оҕо ахсаанынан оҥоһуллубут.

Дьиҥэр, бу дьаһал бары ирдэбилин тутуһан олоххо киллэрдэххэ, биһиги улууска Үөһээ Бүлүү киинигэр биир оҕо уһуйаана атын уһуйааҥҥа холбонуон сөп, ол эбэтэр 7 уһуйаантан 6 уһуйаан юридическэй сирэй буолар. Ити эрээри уһуйаан сабыллыбат, холбоммут уһуйаанын кытта биир бэчээттэнэр, биир хармааннанар.

Көтөрдөөх уонна Күүлэт уһуйааннарыгар, билиниэххэ наада, балаһыанньа уустук. Бу уһуйааннарга бииригэр 8, иккиһигэр 4 эрэ оҕо сылдьар, төрдүөн биир ыал оҕолоро. Бу уһуйааннарга холбоон 12 оҕону иитэргэ 30-ча үлэһиттээх. Ирдэбил быһыытынан, саатар уһуйааҥҥа кырата 10 оҕо сылдьыан наада. Онтон орто сүһүөҕү (11 кылаас) бүтэрэр оҕобут ахсаана быйыл 238, биэс сыл анараа өттүгэр 438 оҕо этэ. Ол эрэн, улуус баһылыга Владимир Поскачин Үөрэх уонна наука миниистирин аатыгар муус устар ыйга ыыппыт анал суругар, Тамалакаантан ураты ханнык даҕаны үөрэх тэрилтэтигэр уларыйыыны киллэрбэтин туһунан ыйан турар. Тамалакааҥҥа саҥа оскуола-саад, ол эбэтэр, оскуоланы уонна уһуйааны саҥалыы бырайыагынан биир дьиэҕэ киллэрэн тутуу ыытарга үлэлэһэ сылдьабыт. Онтон сиэттэрэн, биир дьиэҕэ икки тус-туһунан «юрлицо» табыгаһа суоҕунан, бэйэни салайыныы 131 нүөмэрдээх сокуонугар олоҕуран туран, олохтоохтор уопсай мунньахтарын уураҕа тахсыбытынан холбоһуу барыаҕа.

Спиридон Борбуев быһаарарынан, итэҕэстэри барытын ыйан туран, дьокутаат Феодосия Габышеваны кытары ыкса үлэ ыытыллар. «Феодосия Васильевна аҥардас биһиги эрэ улууспутун буолбакка, биһигинэн сирэйдээн, холобур оҥостон, өрөспүүбүлүкэ үөрэхтэрин тэрилтэлэрин, ордук хоту уонна суола-ииһэ суох тыа сиригэр үөрэх тэрилтэлэрэ хайдах буолуохтаахтарын ыйан туран күүскэ үлэлиир. Үөрэх миниистирин дьаһалынан тэриллибит хамыыһыйа быдан табыгастаах “МШР-3» бырайыагы оҥорон таһаарбыта. Бу билигин ырытыыга сылдьар. Бу халыыбы Үп уонна Экэниэмикэ министиэристибэлэрэ бигэргэтэллэригэр баҕарабыт. Дьокутааппыт туоруорсуутунан Ил Түмэн хас даҕаны сис кэмитиэтэ кыттыылаах мунньахтар саҕаланнылар. Дьокутаат Габышева хас биирдии оскуола, уһуйаан уратыта учуоттаныллыахтаах диэн күүскэ туруорсара хайҕаллаах«, — диир кини.

Үөһээ Бүлүү үөрэҕин эйгэтин кылаабынан киһитэ этэринэн, үчүгэйдик ааҕан көрдөххө, бырабыыталыстыба дьаһала тыа сирин сайдыытыгар туһуламмыт буолуон сөп. Ол эбэтэр, чуолкай сыыппаралары туруоран, хас биирдии нэһилиэк ол сыыппараҕа дьулуһарыгар, бэрээдэктэнэригэр, нэһилиэк салалталара күүскэ үлэлииллэригэр көҕүлүүр. «Дьаһал хас биирдии киһи нэһилиэгин туһугар кыһалларыгар ыҥырар. Холобур, дэриэбинэттэн киин сиргэ төрүү барбыт дьахтар оҕотун туоһу суругар нэһилиэгин ыйдарыахтаах, оччотугар бу төрөөбүт оҕо бу нэһилиэккэ суруллар, Дьокуускайга буолбатах. Оҕо ханна төрөөбүтүнэн суруллар диэн быраабыланан, оҕотун ахсаанын сүтэрэн олорор нэһилиэк үгүс. Оҕо төрөппүттэрин кытта нэһилиэккэ олорорун үрдүнэн. Ол эрэн, дьаһал кэккэ ирдэбиллэригэр биирдиилээн уларыйыылар киириэхтэрин наада. Холобур, “условно отнесенные к городским пунктам” диэҥҥэ 1001 киһиттэн үөһэ диэбиттэрэ сыыһа. Манна Үөһээ Бүлүү, Үөдүгэй, Нам, Хоро, Дүллүкү киирэллэр. Ол туһунан, ыам ыйын 21 күнүгэр Хаҥалас улууһун Өктөм нэһилиэгэр буолуохтаах Ил Түмэн «Тыа оскуолатын туруга уонна сайдыыта» диэн улахан мунньаҕар 202 дьаһал тула сүрүн дакылааты оҥоруохтаахпын, онно ыйыаҕым«, — диэн санаатын ситэрэн биэрдэ.

Спиридон Борбуев дьаһалга быһаарыы биэрдэ. Кини оҕону иитии-үөрэтии аҥардас оскуола, уһуйаан эрэ кыһалҕата буолбатаҕын өссө төгүл санатан туран, кырачаан киһини дьиэ иһэ уонна тулалыыр эйгэтэ иитэрин тоһоҕолоон бэлиэтиир. Онон киирэр уларыйыылар саҥа үйэ киһитэ аныгы олоххо бэлэмнээх буолан тахсарыгар туһаайыллалларын өйдүүр, өйдөтөр наадатын чопчулуур.

Читать оригинал статьи и комментарии на Ulus.Media
$:63
:71
¥:91
$10630.84
в Якутске 11°
завтра 16°