Боруулаах чугаһыгар тыатааҕылары көрдүлэр

19 мая 2019, 14:08

Дьааҥы улууһугар Татариновтар дьиэ-кэргэн Баатаҕайтан Боруулаахха айаннаан кэлэн иһэн, карьерга оҕолоох эһэни көрбүттэр. Кураан дьылга сиэмэх кыыллар ынах сүөһү, сылгы иитэр хаһаайыстыбаларга, тыаҕа сылдьар дьоҥҥо кутталы үөскэтэллэр.


Бэҕэһээ Дьааҥы улууһун Баатаҕайыттан Никита Татаринов дьиэ-кэргэнинээн айаннаан кэлэн иһэн, Боруулаах бөһүөлэгиттэн 4 биэрэстэлээх Саһыл ферматын диэки карьерга оҕолоох эһэ сылдьарын хаартыскаҕа түһэрбиттэр. Эһэ оҕото айанньыттартан куттанан тииккэ ыттыбыт, ийэтэ оҕотун аттыттан тэйбэтэх.

Никита кэргэнэ Анна Юрьевна кэпсиир:

Эһэ оҕотун көмүскээтэ быһыылаах, утары массыынаҕа сүүрэн кэлэ-кэлэ, ойуурга төттөрү ыстанар уонна ырдьыгыныыр. Биһиги түннүкпүтүн арыйан көрөбүт, оҕото тиит үрдүгэр олорон ийэтигэр хаһыытыыр, олох туспэт. Онтон аргыый аҕай айаннаабыппыт. Ийэтэ кэлбитигэр эһэ оҕото тииттэн түспүтэ, ойуур устун сүүрэн бара турбуттара. Соҕотоҕун сылдьыбытым буоллар, телефоммун таһаарбакка куотар буоллаҕым, кыыллар олус чугас этилэр.

Татариновтар бу айаннаан иһэн, мантан чугас бииргэ сылдьар биэс эһэни көрбүттэр.

«Быйылгы кураан дьылга адьырҕа кыыллар аһыыр астара кэмчи. Сүөһү, сылгы иитэр хаһаайыстыбаларга, тыаҕа сылдьар дьоҥҥо кутталлаах быһыы-майгы үөскээбитэ билиннэ«, — дииллэр олохтоохтор.

Ааптар: Боотто Асхаарап, Анна Татаринова хаартыскаҕа түһэриилэрэ

Читать оригинал статьи и комментарии на Ulus.Media
$:63
:71
¥:91
$12555.28
в Якутске 23°
завтра 23°