Чурапчылар Дьиэ кэргэн декадатын бэлиэтииллэр

19 мая 2019, 16:24

Норуоттар икки ардыларынааҕы Дьиэ кэргэн декадатынан Чурапчыга араас тэрээһиннэр ыытылыннылар. Үгэскэ кубулуйбут «Сибэкки бырааһынньыга», ыһыах симэҕин атыыта, «Ньургуһун барахсан» хоһоон ааҕыытын куонкуруһа буолла. «Хотунум — мин ийэм, кийиитим — мин дьүөгэм» сонун күрэх сүрэхтэннэ.


Чурапчыга араас оҕуруот аһын, сибэкки арассаадаларын уонна талах мас атыыта сылтан сыл элбээн иһэр. Хаһаайкалар бэлэм эбэтэр сэдэх арассааданы атыылаһалларын ордороллор.

Арассаада эрэ атыыта буолбакка, ыһыах симэҕин быыстапка-дьаарбаҥката эмиэ болҕомтону тарта. Ыһыах чугаһаан, дьон наадыйар симэхтэрин, киэргэллэрин атыыластылар.

Өрөспүүбүлүкэтээҕи, улуустааҕы дьиэ кэргэн күрэхтэрин кыайыылаахтарыгар, призердарыгар Чурапчыттан Верховцевтар, Слепцовтар, Семеновтар, Сылаҥтан Борисовтар, Төлөйтөн Капрыновтар, Мугудайтан Дьячковскайдар дьиэ кэргэттэригэр улуус дьаһалтатын наҕараадатын туттардылар. Чурапчы нэһилиэгин дьаһалтатын Бочуоттаах грамотатын уонна үрүҥ көмүс бэлиэни чөл олоҕу тарҕатар, бигэ туруктаах Лукиннар дьиэ кэргэттэрин аҕа быһылыга Максим Петрович ылла.

Сибэкки бырааһынньыгар көхтөөхтүк кыттар дьоҥҥо анал ааттар олохтоноллор. Ол курдук, быйылгы кыайыылаахтарынан буоллулар: “Сибэккинэн кэрэни дэлэтээччи”- Любовь Неустроева (Чурапчы), “Дэлэй арассаада, өлгөм үүнүү”- “Березка” уһуйаан кэлэктиибэ (Чурапчы), “Көхтөөх оҕуруотчут” — СеменМакаров (Чакыр), “Кэскиллээҕи салайсан, быйаҥы уһансан” — Матрена Федорова (Сылаҥ), “Эмтээх үүнээйини тэнитээччи” — Октябрина Окорокова (Чурапчы).

Улуустааҕы бибилэтиэкэ «Ньургуһун барахсан» хоһоон куонкуруһун тэрийдэ.

«Хотунум- мин ийэм, кийиитим- мин дьүөгэм» диэн түөлбэлэр икки ардыларыгар куонкурус сүрэхтэннэ. Биэс хотуннаах кийиит түһүмэхтэргэ күрэхтэстилэр.

Кийииттэр хотуннарын кытта ийэлээх кыыс курдуктар, бэйэ-бэйэлэрин ситэрсэн, өйөһөн, түһүмэхтэр тухары сиэттиһэ сырыттылар. «Чараҥ» ТОС-тан Слепцовтар- ЛюдмилаЕвдокимовна кийиитинээн Любовь Дмитриевналыын кыайыы өрөгөйүн биллилэр.

«Талба талаан» аат Екатерина Михайловна кийиитинээн Ирина Михайловна Поповтарга, «Истиҥ сыһыан» аат Надежда Ивановна кийиитинээн Ольга Георгиевна Кардашевскайдарга, «Алаһа дьиэ аанньаллара» аат Розалия Петровна кийиитинээн Мотрена Витальевна Пермяковтарга, «Кэрэ көстүү» аат ТатьянаАфанасьевна кийиитинээн Анна Васильевна Степановтарга иҥэрилиннилэр.

Ааптар: Екатерина Ефремова

Читать оригинал статьи и комментарии на Ulus.Media
$:63
:71
¥:91
$12548.01
в Якутске 23°
завтра 23°