Чөркөөх ансаамбыла Япония сыанатыгар саха үҥкүүтүн көрдөрдө

11 июня 2019, 17:45

Чөркөөх нэһилиэгин «Сардаана» бөлөҕө Токио куоракка буолбут Аан дойдутааҕы үҥкүү фестивалыгар кытынна. Үҥкүүһүттэр Япония курдук улуу дойдуга тиийэн, саха норуотун култууратын киэҥ түһүлгэҕэ билиһиннэрдилэр.


Чөркөөх нэһилиэгин Л.Н.Семенова салайааччылаах «Сардаана» үҥкүү бөлөҕө ЮНЕСКО тэрийиитинэн Токио куоракка буолбут аан дойдутааҕы үҥкүү фестивалыгар кыттыыны ылла.

Фестивальга араас омук сириттэн кыттааччылар кэлбиттэр. Ол курдук, Сингапур, Малайзия. АХШ, Италия, Япония, Индонезия, Кытай, Канада уо.д.а. дойдулар үҥкүүһүттэрэ мустубуттар. Россия аатыттан Саха сирин үс бөлөх билиһиннэрдэ. Фестиваль Галакси кииҥҥэ баар кэнсиэртиир саалаҕа буолла. Бу улахан таһымнаах тэрээһиҥҥэ кыттыы туоһу суругун ЮНЕСКО Токиоҕа бэрэсэдьиэнэ Ерика Ако бэйэтинэн туттарда. Фестивалы Япония телевидениета сырдатта.

Күн тахсар дойдута Японияҕа ыытыллыбыт фестивальга кыттарга күүс көмө буолбут дьоммутугар улуус баһылыгар М.М.Соровка, нэһилиэкпит баһылыгар М.Г.Аржаковка, улуус мунньаҕын бэрэссэдээтэлигэр В.А.Охотиҥҥа, «Алаһа» түмсүүгэ (сал.Р.Н.Моржотоваҕа), «Далбар» түмсүүгэ (сал. Д.А.Сивцеваҕа) махталбытын тиэрдэбит.

Биһиги сылдьар кэммитигэр аан дойдуга бастакынан дьон көрүүтүгэр «Мамонт» быыстапката Токиоҕа аһыллыбыта. Онно Саха сиригэр булуллубут мамонт уҥуохтара көрдөрүүгэ туруоруллубуттар. Манна үлэлиир туһааннаах дьон: «эрдэ билбиппит буоллар, быыстапка аһыллыытыгар кытыннарыа хаалбыппыт», — диэн хомолтолорун биллэрдилэр. Ол да буоллар Япония курдук улуу дойдуга норуоппут култууратын көрдөрбүппүт, араас омук үҥкүүһүттэрин кытта улахан түһүлгэҕэ үҥкүүлээбиппит олохпутугар биир умнуллубут, үтүө өйдөбүл буолан хаалыаҕа, — диир Сардаана Аввакумова.

Ааптар: «Таатта» хаһыат

Читать оригинал статьи и комментарии на Ulus.Media
$:64
:71
¥:90
$10234.71
в Якутске
завтра