Аммалар Арассыыйа күнүгэр субуотунньукка таҕыстылар

13 июня 2019, 15:57

Аммаҕа Арассыыйа күнүгэр «Биир ньыгыл партия» көҕүлээһининэн флешмоб тэрийдилэр. Дойду бырааһынньыгар Саха сирин норуоттарын VII спортивнай оонньууларын көрсө Амма нэһилиэгин тэрилтэлэрэ, түмсүүлэрэ уонна олохтоохторо субуотунньукка таҕыстылар.


Аммаҕа Арассыыйа күнүгэр «Биир ньыгыл партия» Амма улууһун олохтоох отделениетын көҕүлээһининэн флешмобу тэрийдилэр. Бу күн дойду Амма нэһилиэгин тэрилтэлэрэ, түмсүүлэрэ уонна олохтоохторо күргүөмнээх үлэҕэ таҕыстылар. Оскуолалар уонна үөрэх салалтатын эр дьоно остолобуойдарга туруохтаах тэриллэри тиэйдилэр. Кэлбит хочуоллары, холодильниктары, кулердары бэйэлэрин оскуолаларыгар тиксэрдилэр. Нэһилиэк дьаһалтатын кытта дуогабардаспыт урбаанньыт Артур Эм 16 тыһыынча сибэккини аҕалла. Кииннэммит бибилэтиэкэ, социальнай көмүскэл управлениета, ГТАС, бизнес инкубатор уонна да атын тэрилтэ үлэһиттэрэ Кэлбит сибэккилэри анал дьааһыктарга көһөрүүгэ уонна сквердэргэ олордууга үлэлээтилэр. «Арассыыйа ийэлэрэ» уопсастыбаннай хамсааһын Амматааҕы салаата Албан аат болуоссатыгар сибэккини олордорго көмөлөстө.

Саҥа оҥоһулла сылдьар Михаил Скрябин аатынан сквергэ Амма 2№-дээх орто оскуола эр дьоно мас олордуутугар үлэлээтилэр. СӨ экономикатын министиэристибэтин көҕүлээһининэн уонна көмөтүнэн оҥоһуллан эрэр «Экэнэмиистэр сквердэригэр» үп салалтатын үлэһиттэрэ тахсан сирин — уотун көннөрдүлэр. Инникитин манна чаһы уонна сырдатар банаардар туруохтара, министиэристибэ бэрэстэбиитэллэрэ кэлэннэр сибэкки олордуохтара. Улуус дьаһалтатын уонна баһаарынай чаас үлэһиттэрэ эргэ «Ручеек» оҕо садын дьиэтин көтүрдүлэр. Оттон нэһилиэк дьаһалтатыгар сыһыарыллыбыт тэрилтэлэр көтүрүллүбүт уопсай дьиэ оннун ыраастаатылар.

Бу курдук Арассыыйа күнүн олохтоохтор нэһилиэктэрэ тупсаҕай, сиэдэрэй көстүүлээх буоларыгар кылааттарын киллэрэн бэлиэтээтилэр.

Ааптар: Алтана Артемьева

Читать оригинал статьи и комментарии на Ulus.Media
$:64
:71
¥:90
$10240.14
в Якутске
завтра