Үөһээ Бүлүү ыччата Арассыыйа күнүгэр бастакы пааспардарын тутта

12 июня 2019, 17:12

Үөһээ Бүлүү улууһун олохтоохторо, ыалдьыттара Дьокуускай куорат аатынан искибиэргэ дьоһун суолталаах судаарыстыбаннай бырааһынньыгы — Арассыыйа күнүн бэлиэтээтилэр. Уон түөрт саастарын туолбут оҕолорго РФ гражданина буолалларын туоһулуур пааспардары туттардылар.


“Модун Арассыыйа” — мин киэн туттуум” бырааһынньыгы «Үөһээ Бүлүү улууһа» муниципальнай оройуон дьаһалтатын баһылыгын үпкэ, экэниэмикэҕэ солбуйааччыта Наталья Гурьева, үөрэх управлениетын начаалынньыга С.О. Борбуев эҕэрдэлэринэн арыйдылар. Мустубут дьон Арассыыйа гиимнин биир киһи курдук өрө көтөҕүллүүлээхтик ыллаата.

Бэлиэ күҥҥэ сөп түбэһиннэрэн, уон түөрт саастарын туолбут 11 кэнчээри ыччат РФ гражданина буолалларын туоһулуур пааспары аан бастаан тутта. Кинилэри «Үөһээ Бүлүү улууһа» муниципальнай оройуон дьаһалтатын баһылыгын үпкэ, экэниэмикэҕэ солбуйааччыта Н.Ф. Гурьева, улуустааҕы миграционнай сулууспа начальнига А.В. Иванова эҕэрдэлээтилэр.

Биһиги өрөспүүбүлүкэбитигэр Арассыыйа күнэ улахан суолталаах күн. Үөһээ Бүлүү улууһа Арассыыйа быстыспат сорҕото буолар. Оҕо искусство оскуолатын үлэһиттэрэ ыалдьыттары түмэ тардан, флешмоб үҥкүүлэттилэр. «Тускул» оҕо сайдар киинэ «Россия-щедрая душа» аспаалга уруһуй күрэҕин ыытта. Ыалдьыттары минньигэс бөрүөгүнэн күндүлээтилэр, араас спортивнай күрэхтэр, кэнсиэр буолла.

Улуу Арассыыйа былааҕын аннынан чэчирии сайдар, күннэтэ тупсар, киэркэйэр Үөһээ Бүлүү дьоно-сэргэтэ бу үтүө бырааһынньыгы үрдүк тэрээһиннээхтик көрүстэ.

Ааптар: Валентина Филиппова

Читать оригинал статьи и комментарии на Ulus.Media
$:63
:71
¥:91
$12497.12
в Якутске 24°
завтра 23°