Дьарҕаалаахтар үтүө сайыны түстээн ыһыахтаатылар

9 июля 2019, 19:30

Дьарҕаалаах нэһилиэгэр баһылык Лев Горохов эҕэрдэ тылынан саха мааны бырааһынньыгын арыйда. Үгэс быһыытынан ыһыахха анаан байтаһын биэни идэһэлэнэн, сип — сибиэһэй сылгы иһин, хаанын, быарын амсайан, дьон үөрдэ-көттө.


Дьарҕаалаах кырдьаҕас эбээлэрэ айылҕаттан күүс ыла кэлбиттэрэ киһини үөрдэр. Түөлбэнэн хорчуопка кэмигэр кэрэ куоластаах Михаил Рожин, Николай Иванов, Туйаара Петрова уо.д.а. ылбаҕай ырыаларынан эҕэрдэлээтилэр. Лааҕыр кыра оҕолоро эрчимнээхтик үҥкүүлээн көрдөрдүлэр.

Дьиэ кэргэн күрэҕэ сүрдээх сэргэхтик буолла. Манна А.Г. Колесова-Ефремова, уруккута өрөспүүбүлүкэҕэ тиийэ ыллыыр ырыаһыт, сыана, үлэ бэтэрээнэ, улуус бочуоттаах олохтооҕо, Амматтан комсомольскай путевканан тыа хаһаайыстыбатын өрө тарда 17 сааһыгар 17 буолан кэлбиттэртэн биирдэстэрэ кыттыыны ылла. Валерия, Лев Гороховтар кыра уолларын Валерчиктыын, мааны кыыстара Алиналыын бары сиэдэрэй сахалыы таҥас кэтэн тахсыбыттара дьон болҕомтотун тарта. Алина эбээтиниин Вера Афанасьевналыын бэрт үчүгэйдик ыллаан иһитиннэрдилэр. Эгэлгэ ас хас да көрүҥүн сахалыы кыраһыабай иһиттэргэ көрдөрүүгэ туруордулар. Дьүүллүүр сүбэ Т.П. Петрова, А.Н. Стручкова, Н.И. Иванов сыаналаатылар. Дьүүллүүр сүбэ быһаарыытынан Валерия, Лев Гороховтар дьиэ кэргэттэрэ 1 миэстэни ылыан ылла. 2 миэстэни Дьааҥыттан төрүттээх Роза Николаевна Стручкова кыыһа Евдокия Павловналыын уонна сиэнэ Алиалыын ыллылар. Роза Николаевна сахалыы поппури ыллаан иһитиннэрдэ. Амматтан комсомольскай путевканан кэлэн, ыал буолан, элбэх оҕо төрөтөн, элбэх сиэн, хос сиэн тапталлаах эбээтэ Людмила Григорьевна Старостина сиэнэ Ньургустаан Старостинныын кыттан үһүс буоллулар. Мааны сахалыы иһиттэргэ ас арааһын көрдөрдүлэр, ону таһынан эгэлгэ оҥоһуктарын быыстапкаҕа таһаардылар. Манна дэйбиирдэри, быысапкаламмыт, мозаиканан оҥоһуллубут хартыыналары, түөскэ иилиллэр брошкалары уо.д.а дьон сөҕө махтайа көрдө. Никитина Ольга Дмитриевна кыра уола Ньургуннуун уонна сиэнэ Тургуннуун тахсан күрэхтэстилэр. «Кыттааччылар биһирэбиллэрэ» бирииһэ — «Көмүлүөк» иһитинэн наҕраадаланнылар.

Оҕолорго уонна улахан дьоҥҥо кыраһыабай бүрүчүөскэ күрэҕэ буолла. Манна улахан дьоҥҥо Любовь Юрьевна Капитонова 1 миэстэ ылла. Мария Николаевна Слепцова-Стручкова 2 миэстэ, Кыыдаана Николаева 3 миэстэ ыланнар бары бириис тутан үөрдүлэр-көттүлэр. Оҕолорго 1 миэстэни сардаана сибэкки бүрүчүөскэлээх Ариша Слепцова ылан үөрдэ. 2 миэстэни 5 саастаах уһун суһуохтаах Эвелина Сергеева «Ромашка» бүрүчүөскэнэн эмиэ бириис ылан үөрдэ. 3 саастаах кыракый Василина Стручкова «Сибэкки» бүрүчүөскэҕэ 3 миэстэ ылан эмиэ бэртээхэй бириис ылла. Алина Горохова, Дайаана Стручкова көхтөөх кыттыыларыгар кыракый бириистэри ылан үөрдүлэр. Бу тэрээһиннэри саҥаран — иҥэрэн Михаил Рожин ыытта. Спортивнай оонньуулары Николай Иванов салайан ыытта. Оҕолорго Ньургун Юмшанов 1 миэстэҕэ тахсан футбол мээчигин, Леня Черноградскай 2 миэстэлэнэн бэртээхэй спортивнай оонньууну бэлэх туттулар. Айгылаан Баишев 3 миэстэтин иһин бэртээхэй оонньуурунан бэлиэтэннэ. Улахан оҕолорго Саккырыыртан А. Сотрудникова 1 миэстэ ылан футбол мээчигэ бириистэннэ. Кустууртан сылдьар К. Николаева 2 миэстэ, Н. Иванов 3 миэстэ буоллулар.

Хапсаҕайга ыарахан ыйааһыҥҥа Баишев Николай — 1 миэстэ, Ньургустаан Старостин — 2, 3 миэстэ — Миша Рожин. Чэпчэки ыйааһыннарга Егор Слепцов — 1 миэстэ, 2 миэстэ — Ваня Иванов, 3 миэстэ — Семен Слепцов. Бары сыаналаах бириистэринэн наҕараадаланнылар, үөрүүлэрэ муҥура суох. Мас тардыһыыга абсолютнай кыайыылаах аатын Семен Пионерович Слепцов сүгэн үөрдэ-көттө, мүһэ уонна сыаналаах бириис ылла. Хапсаҕайга абсолютнай чөмпүйүөн Егор Слепцов буолла. Гиирэ быраҕыыга Баишев Коля — 1 миэстэ, Ньургустаан Старостин — 2 миэстэ, Ваня Иванов — 3 миэстэ буоланнар араас сыаналаах бириистэринэн биһирэннилэр. Ыарахан тааһы көтөҕүүгэ Николай Баишев иннин биэрбэтэ, кини маҥнайгы бочуоттаах миэстэни ылла. Алик Старостин -2 миэстэ, Миша Рожин — 3 миэстэни ылан эмиэ бары сыаналаах бирииһи туттулар. Мас тардыһыыга кыра ыйааһыҥҥа С.П. Слепцов — 1 миэстэ, Ваня Иванов — 2 миэстэ, Егор Слепцов — 3 миэстэ ылан бириис үчүгэйин тутан үөрүүлэрэ үрдээтэ, эрчимэ билиннэ. Кыргыттарга мас тардыһыытыгар Сардана Петрова — 1 миэстэ, Матрена Баишева — 2 миэстэ, Туйаара Петрова — 3 миэстэ буоллулар. Сүүрүүгэ Туйаара Петрова — 1 миэстэ, Сардана Петрова — 2 миэстэ, Матрена Баишева — 3 миэстэ. Үс төгүл үс күрэххэ 1 миэстэ — Ваня Иванов, 2 миэстэ — Егор Слепцов, 3 миэстэ — Миша Рожин буоллулар. Күрэхтэри ыытыыга тэҥҥэ сүүрдүлэр-көттүлэр эдэр ыччат лидерэ Матрена Баишева, тыа хаһаайыстыбатын исписэлииһэ Оксана Стручкова, ЭКК дириэктэрэ Татьяна Петровна Петрова, Михаил Рожин.

Оһуохайга 80-нун лаппа ааспыт кырдьаҕас Акулина Егоровна Никитина, Аида Николаевна Стручкова, Иванов Николай Иванович, Клара Николаевна Стручкова-Захарова кытыннылар. 1 миэстэ — Никитина А.Е., 2 миэстэ — К.Н. Стручкова-Захарова, 3 миэстэ — А.Н. Стручкова ыллылар, бэртээхэй бэлэх туттулар.

Киэһэ волейболга күрэх үгүс киһини муста, түргэн тэтимнээх оонньуу буолла. Үстэ киирсэн Иванов Коля, Иванов Ваня, Оксана Стручкова, Егор Слепцов, Нарыйа Иванова, Маша Шухардинова кыайыыны ситиһэн харчынан бириис ыллылар. Бэрт кыранан хааллылар Баишев Коля, Мичил Горохов, Ксенофонт Слепцов, Вадим Стручков, Юлианна Захарова, Акулина Аммосова. Кинилэр эмиэ биһирэннилэр. Түмүгэр уоттаах — күөстээх үҥкүү киэһэтэ буолла.
Сити курдук, ыһыах олус үчүгэйдик ааста, күн да туран биэрдэ. Олохтоохтор кураан, сут дьыл буолбатыгар, сир аһа үүнэригэр, сыспай сиэллээх. хороҕор муостаах элбииригэр, үтүө сайыны түстээн кымыс ыһан сир, айылҕа иччититтэн көрдөстүлэр

Ааптар: Марта Горохова

Читать оригинал статьи и комментарии на Ulus.Media
$:64
:71
¥:90
$8229.14
в Якутске -7°
завтра -3°