Манчаарылаах горнайдар тоҕус мэтээли ситистилэр

12 июля 2019, 14:04

Аммаҕа ыытыллыбыт Саха сирин норуоттарын VII спортивнай оонньууларыгар горнайдар уопсай түмүккэ 16-с миэстэ буоллулар. Араас көрүҥнэргэ уопсайа 9 мэтээли ситиһэн, бэйэлэрин бөлөхтөрүгэр 11-с көрдөрүүлээхтэр.


Горнайдар иккис бөлөххө киирэн куоталастылар. Манна өрөспүүбүлүкэҕэ куораттартан уонна хоту оройуоннартан ураты, спорт эйгэтигэр инники күөҥҥэ сылдьар улуустар бары киирэллэр. Онон улахан күрэстэһиилээх. Бөлөххө 11-с көрдөрүүлээхтэр. Бу олус сэмэй диэххэ наада. Манна сорох көрүҥнэргэ путевка суоҕа, улаханнык оҕуста. Оттон спортсменнарбыт ситиһиилэринэн үөрүөх тустаахпыт.

Түөрт сылга биирдэ ыытыллар спорт бырааһынньыга, үрдүк тэрээһиннээхтик барбытын үгүс дьон бэлиэтиир. Барыта 3000 кэриҥэ спортсмен, 35 хамаанда спорт 16 көрүҥэр бастыҥ ааты былдьастылар.

Көҥүл тустууга оҕолорго Алексей Сухарев, Эдгар Кудаисов үрүҥ көмүс, Марат Павлов боруонса, улахан дьоҥҥо Михаил Васильев, Александр Контоев кыһыл, боксаҕа Андрей Софронеев боруонса, Егор Пахомов кыһыл, буулдьанан ытыыга Мария Егорова, Арсен Саввин кыһыл көмүс мэтээллэри элбэх көлөһүннэрин тоҕон, кытаанах күрэстэһиини туораан ыллылар.

Оҕунан ытыыга Валентина Соркомова, көҥүл тустууга Петр Сивцев, Эрхаан Соркомов, Николай Константинов, Вячеслав Ефремов пьедесталга биир хардыынан тиийбэтилэр. Кумахха волейбол кэскиллээҕин көрдөрдө. Кыргыттарбыт, уолаттарбыт бэркэ кытыннылар. Фитнес хамаандата көрөөччүлэр биһирэбиллэрин ылыан ылла.

Марафон (42 км 195 м) сүүрүүктэрэ үөртүлэр, 33 киһиттэн Прокопий Григорьев (бириэмэтэ 3 чаас 2 мүнүүтэ) тохсус, Виктор Константинов (3 ч. 7 мүн.) уон үһүс түмүктээтилэр. Манна киһи ылла да мээнэ санаммат. Спорт биир ыарахан көрүҥэ буолар. Кыттааччылар финишкэ тиийбэккэлэр, тулуйбаккалар биэтэктэн туорууллара үгүс.

Амма бырааһынньыгын ат сүүрдүүтүн күрэхтэһиитэ киэргэттэ. Манна Мытаахтан Валерий Варламов ата “Джокер» 4000 м кыайыылааҕынан тахсан, сыаналаах бирииһинэн наҕараадаланна. Санатан эттэххэ, «Джокер» Туймаада хочотун ыһыаҕар бэйэтин биэтэгэр бастакынан киирэн, чөмпүйүөн үрдүк аатын ылбыта.

Атын көрүҥнэргэ илин-кэлин түһүспүт спортсменнарбыт ситиһиилэрэ куһаҕана суох. Бэйэлэрин көрдөрүүлэрин тупсаран, кыахтара баарынан кытыннылар. Күрэхтэһии кэннэ тренердэр санааларын иһиттим.

Осип Михайлов, көҥүл тустууга Горнай улууһун эппиэтинэстээх тириэньэрэ:

Уолаттар кыахтара баарынан кииристилэр. Былааммыт туолла. Кыттыыбытын үчүгэйинэн сыаналыыбын. Кыра нэһилиэнньэлээх улуус буоларбытын умнумуох тустаахпыт. Георгий Даниловка эрэммитим. Кини ситэри арыллыбата. Көбүөргэ тахсыыларын тохтоппут уолаттарбыт Петр Сивцев, Николай Константинов, Антон Константинов, Эрхаан Соркомов бэркэ кииристилэр. Олус наадалаах очукуолары биэрдилэр.

Түгэнинэн туһанан, “Бэрдьигэстээх нэһилиэгэ» МТ баһылыгар М.С.Парфеновка, “Амгор» ХЭТ дириэктэригэр Н.Ж.Бельдыга, солбуйааччытыгар А.Г.Чемезовка хамаанда сүүмэрдиир дьарыктаныыны ааһарыгар улахан көмө буолбуттарыгар, өрөспүүбүлкэ киэн туттар спортсменыгар Александр Контоевка, кини төһө да тустуутун тохтоттор, мин көрдөһүүбүн ылынан, хамаанданы өйөөн, улууһун аатын чиэстээхтик көмүскээбитин иһин улахан махталбын тириэрдэбин.

Инникитин хамаанда ситиһиилээх буоларыгар, уолаттарга болҕомто ууруллуон наада. Эдэр бөҕөстөрбүтүн, Родион Ефремовы, Михаил Васильевы, Эдуард Максимовы, Иван Ефремовы уонна да атыттары өйөөтөххө, элбэхтэ күрэхтэһиигэ кытыннардахха, хайа баҕарар тахсар кыахтаахтар.

Биир үчүгэй түмүгү охчуттарбытыттан күүппүппүт. Хомойуох иһин Амматтан биһиги спортсменнарбыт кураанах кэллилэр.

Туох табыллыбатаҕын туһунан тириэньэр Константин Бурцев маннык кэпсиир:

Охчуттарбыт финал 4/1 хоттордулар. Хамаандаҕа 1994-1995 с.с. төрүөх спортсменнар киирдилэр. Оттон эдэрдэргэ оҕолорбут суохтар. Розалина Тимофеева сүүмэрдиир күрэхтэһиигэ ыалдьан кыттыбатаҕа. Сайыына Иванова өрөспүүбүлүкэ чемпионатыгар кыайтаран путевка ылбатаҕа. Илья Варламов олус тыҥааһыннаах киирсиигэ утарсааччыларын хотуталаан, Аммаҕа кыттар быраабы ылбыта.

Блочнай оҕунан ытыыга Сардаана Барашкова бэлэмэ суоҕун көрөн, Валентина Соркомованы киллэрбиппит. Кини төрдүс миэстэ буолла. Кылгас кэм иһигэр дьарыктаммыт диэтэххэ, көрдөрүүтэ үчүгэй. Родион Николаев ситэри үлэлээбэтэ. Бу оонньууларга былаана суох үлэбит таайда.

Инникитин 2003-2005 сс. төрүөх оҕолору бэлэмнээһиҥҥэ болҕомто ууруохтаахпыт. Хас биирдии көрүҥү сайыннарыахтаахпыт. Хамаандаҕа биир миэстэҕэ 4-5 киһиттэн талан ыларга дьулуһуохтаахпыт. Билигин сыыһабытын-халтыбытын барытын үөрэтэн, былаан туруорунан, сорук ылынан үлэбитин өссө күүһүрдүөхпүт.

Биирдиилээн ытыыларга классическай оххо Илья Варламов ахсыс, Айыына Романова сэттис, блочнай оххо Валентина Соркомова төрдүс, Родион Николаев уон бэһис көрдөрүүлээхтэр. Дьиҥинэн үс мэтээлгэ санаммыппыт. Хамаанданан классиктар төрдүс, блочнайдар уон бэһис миэстэҕэ таҕыстылар.

Степан Заровняев, дуобат тириэньэрэ:

Хамаандабыт уопсай түмүккэ, оҕолор көрдөрүүлэрин кытары төрдүс буолла. Улуустар бары олус күүскэ бэлэмнэнэн кэлбиттэрэ көстөр. Күрэхтэһии таһыма да ону ирдиир. Биһиги састааппыт куһаҕана суох. Спортсменнар үс дуоскаҕа 64, икки дуоскаҕа 100 харахтаах дуобакка оонньоотулар. Күрэхтэһиини бастаан бэркэ саҕалаабыттара. Кэлин күүстээх хамаандаларга 3:2 ахсаанынан хоттордубут. Биирдиилээн дуобатчыттартан Станислав Контоевы, Ангелина Попованы бэлиэтиэх тустаахпын.

Амматааҕы оонньууларга атын хамаандаларга биһиги улуустан үүнэн-сайдан, кынат анньынан тахсыбыт спортсменнар аҕыйаҕа суохтар. Кинилэр ситиһиилэригэр биһиги тэҥҥэ үөрсэн, Горнай аатын дуорааннаахтык иһитиннэрдибит. Ол курдук, Чурапчыттан боксаҕа Борис Сидоров кыһыл көмүс, Дьокуускайтан чэпчэки атлетикаҕа Ирина Осипова-Кондакова икки кыһыл көмүс, остуол тенниһигэр Марфа Колодезникова иккиэлэһэн оонньууга кыһыл, булкаас, биирдиилээн оонньууларыгар икки боруонса, хамаанданан түмүккэ үрүҥ көмүс мэтээллэри ылан үөртүлэр. Уус Алдан волейболга хамаандатыгар Саргылаан Яковлев, Таатта кумахха волейболга хамаандатыгар Эдуард Чемезов ситиһиилээхтик кытыннылар.

Спорт диэн спорт, ким эрэ кыайыахтаах, ким эрэ хотторуохтаах. Хамаандабыт биирдиилээн көрүҥнэргэ кыттыылара куһаҕана суох. Онно эбии атын улуустарга биир дойдулаахтарбыт ситиһиитин аахтахха, горнайдар хаачыстыбабыт лаппа тупсар. Улууспутугар ыытыллыахтаах Манчаары оонньууларыгар сыыһаны-халтыны көннөрүнэн, сөптөөх хамаанданы күн бүгүҥҥэттэн бэлэмниэх тустаахпыт.

Спортсменнар, тириэньэрдэр улуус баһылыгар Никита Андреевка, ыраах айаны аахсыбакка, ыалдьа тиийбит спорт сүгүрүйээччилэригэр истиҥ махталларын тириэрдэллэр.

Ааптар: «Үлэ күүһэ» хаһыат

Читать оригинал статьи и комментарии на Ulus.Media
$:63
:71
¥:91
$10595.66
в Якутске 14°
завтра 16°