Нам улууһа "Холбон!" акцияҕа көхтөөхтүк кыттар

12 июля 2019, 15:21

Нам улууһун тэрилтэлэрин салайааччылара «Холбон!» акцияны өйүүллэрин биллэрэн, көмө оҥорон эрэллэр. Намҥа бу акцияны социальнай харалта управлениета саҕалаабыта.


Ол курдук управление салайааччыта Феврония Ивановна Охлопкова үлэ ветераныгар Анна Иннокентьевна Ефимоваҕа цифровой приставканы атыылаһан илдьэн туруорбута. Салгыы бу эстафетаны Феврония Ивановна улуус баһылыгын социальнай боппуруостарга солбуйааччытыгар Петр Васильевич Абрамовка туттарбыта. Кини соҕотох олорор биһиги Ытык кырдьаҕаспытыгар, үлэ ветераныгар Александра Саввичнаҕа цифровой телевидение приставкатын атыылаһан холбообута уонна ыҥырыыны НЦРБ салайааччытыгар Иван Иванович Замятиҥҥа ыыппыта. Иван Иванович ыҥырыыны өйөөн, доруобуйа харыстабылын ветераныгар Екатерина Афанасьевна Пестряковаҕа приставканы илдьэн туруорбута. Салгыы бу өйүүр сыаллаах «Холбон!» акцияны улуус үөрэҕириитин управлениетын салайааччытыгар Екатерина Афанасьевна Ядрееваҕа уонна социальнай-экономическай өйүүр фонда салайааччытыгар Андрей Виссарионович Бочкаревка туттарбыта. Соторутааҕыта Екатерина Владимировна Ядреева Ленскэй нэһилиэк биир ытык кырдьаҕаһыгар, үлэ ветераныгар Людмила Павловна Черноградскаяҕа цифровой приставканы илдьэн бэлэхтээбитэ уонна эстафетаны ватсап нөҥүө Нам улууһун пенсионнай фондатын салайааччытыгар Евгений Михайлович Бурцевка уонна Нам 1 N-дээх орто оскуола директорыгар Екатерина Петровна Габышеваҕа ыыппыта.
Онон ыҥырыыны ылынан, үтүө бачыымы салҕаан Евгений Михайлович бэс ыйын 26 күнүгэр улуус ветераннарын Сэбиэтин президиумун бэрэссэдээтэлэ Софья Кобякованы уонна бэрэссэдээтэл солбуйааччыта Иннокентий Иванову кытта үлэ, тыыл ветерана Рафаида Касановна Чумаевскайаҕа тиийэн бэлэҕин туттарда уонна бэйэтэ телевизорга холбоон, каналларын булан, туруоран биэрдэ. Ытык кырдьаҕаспыт маннык бэлэҕи тутуом диэн санаабакка сылдьар киһи олус соһуйда, үөрдэ, махтанна.
Бу күн Фаина Александровна (норуот кинини итинник ыҥырар) төрөөбүт күнэ, 88 сааһын туолбут. Онон бэлэхпит суолтата өссө үрдээтэ, төрөөбүт күнүнэн бэлэх курдук буолла. Биһиги тиийэрбитигэр остуолга турар вазаҕа ийэлэрин, эбэлэрин Аанньал күнүнэн оҕолоро, сиэннэрэ эҕэрдэлээн бэлэхтээбит тыыннах сибэккилэрин дьөрбөтө турара. Төрөөбүт күннээх кырдьаҕаспыт биһигини остуолугар ыҥыран сылаас чэйинэн күндүлээтэ, эҕэрдэлэрбитигэр, бэлэххэ үөрбүтүн биллэрэн «Оренбургский пуховый платок», «Подмосковные вечера» диэн ырыалары билигин да күүстээх, ыраас куолаһынан ис сүрэҕиттэн иэйэн-куойан туран олус истиҥник, иэйиилээхтик ыллаата, алҕаата.
Бары билэрбит курдук, бэс ыйын 3 күнүттэн Россия регионнарыгар телевидение цифровой биэриилэргэ көспүтэ. Мантан ыла биэрилээри анал приставкалары холбоон туһаннахпытына эрэ көрөр буоллубут. Приставкалар атыыга дэлэйдэр эрээри, кыра пенсиялаах, кыаммат араҥа хармааныгар балай да «таһаҕас буолар» сыаналаахтар, холботуута уустуктардаах.
Онуоха республикабыт социальнай харалтаҕа, үлэлээх-дьарыктаах буолууга министиэристибэтэ аҕам саастаахтары, ветераннары уонна элбэх оҕолоох дьиэ кэргэттэри өйүүр сыаллаах «Холбон!» диэн аһымал акцияны биллэрбитэ тоҕоостоох, туһалаах буолла.

Ааптар: Иннокентий Иванов

Читать оригинал статьи и комментарии на Ulus.Media
$:63
:71
¥:91
$10559.37
в Якутске 14°
завтра 16°