Өймөкөөн Үчүгэйин ыччата нэһилиэк сайдыытыгар көхтөөхтүк кыттар

12 июля 2019, 15:06

Үчүгэй нэһилиэгэр кэлэр кыстыкка бэлэмнэнии чэрчитинэн бөһүөлэк сирин-уотун ыраастааһынтан саҕалаатылар. Сэлиэнньэ сирин бөхтөн-сыыстан хомуйууга олохтоохтор бары туруннулар. Оҕо сайыҥҥы сынньалаҥын кэмигэр волонтердар биригээдэлэрэ тэрилиннэ. Олохтоох ыччат эмиэ бу үлэттэн туора турбата.


“Үчүгэй нэһилиэгэ” МТ дьаһалтатын баһылыгын Валентин Атласов иһитиннэриитинэн, бөһүөлэк тас көстүүтүн тупсарыы үлэтэ тиһигин быспакка ыытыллар. Манна быйыл эбии 250 м тротуар оҥордулар, уопсайа килэмиэтир кэриҥэ тротуар тэлгэнэн, олохтоохтор ардахтаах күҥҥэ бөһүөлэк иһигэр холкутук сылдьар кыахтаннылар, бу үлэ өссө даҕаны салҕаныахтаах. Маны сэргэ бөһүөлэк иһинээҕи суолу өрөмүөннээһиҥҥэ эмиэ тустаах болҕомто ууруллар.

Былырыын Үчүгэй нэһилиэгэр 60 миэстэлээх саҥа оскуола тутуута саҕаламмыта. Тутууну “Северагростроймонтаж” ХЭТ биэс киһилээх биригээдэтэ саҕалаабыта. Бу күннэргэ тутууну салҕыырга аукцион ыытылларын күүтэллэр. Тутуу “Мин Сахам сирэ 21-с үйэҕэ” өрөспүүбүлүкэтээҕи үтүө дьыала хамсааһын чэрчитинэн барар.

Бу хамсааһын иитиинэн Үчүгэй нэһилиэгэр өссө 4 кыбартыыралаах олорор дьиэ тутуллара былааннанар. “Дьиэ тутуллар миэстэтигэр фундаменын түһэрэргэ бырайыактыыр үлэ номнуо ыытыллыбыта”, — диир баһылык. Онон сайыҥҥы-күһүҥҥү кэмҥэ тутуллуохтаах дьиэ оннугар таас кутуллара, фундамена түһэрэ, сорох тутуу матырыйаалларын тиэйии былааннанар.

Ханнык баҕарар сэлиэнньэҕэ кэлимник сайдыы сибээһэ уонна суола-ииһэ суох табыллыбат. В.М. Атласов кэпсээбитинэн, олохтоох ыччат Күбүмэ уонна Үчүгэй нэһилиэгин икки ардыгар оптоволоконной сибээс ситимнэрин тардыыга үлэлиэхтээх, Өймөкөөн кууһугар түргэн интернет киирэригэр бэйэлэрин кылааттарын киллэрэргэ бэлэм. “Импульс” НПО кинилэри аһынан-таҥаһынан хааччыйар, онтон хамнастарын олохтоох нэһилиэнньэ көҕүлээһининэн, хас биирдии киһиттэн 500-түү солк. хомуйан төлүүргэ быһаарбыттара.

Ааптар: Любовь Кривошапкина

Наталья Громова хаартыскаҕа түһэриитэ

Читать оригинал статьи и комментарии на Ulus.Media
$:64
:71
¥:90
$8221.92
в Якутске -7°
завтра -3°