Абаҕаҕа үтүөлээх тутааччыга анаммыт кинигэ сүрэхтэннэ

11 августа 2019, 15:16

Амма алгыстаах Абаҕатыгар СӨ үтүөлээх тутааччыта Александр Захаровка анаммыт саҥа кинигэни кытта билистилэр. Айылҕалыын алтыһар тутааччы тэлгэһэтэ үгүс киһини сөхтөрөр.

Амма улууһун Абаҕа нэһилиэгэр тутааччы күнүн көрсө бэртээхэй тэрээһин буолан ааста. Нэһилиэк бочуоттаах олохтооҕо Александр Захаров олоҕун, үлэтин-хамнаһын кэпсиир “Слово и дело строителя Александра Захарова” диэн саҥа кинигэ сүрэхтэннэ. Кинигэни Геннадий Степанов редакциялаата.

Кинигэбит уопсайа түөрт түһүмэхтээх. Сурулларыгар улахан ыарахаттары көрсүбэтим. Матырыйаал да баар этэ. Кинини кытта бииргэ үлэлэспит дьон төһө да аҕыйаабыттарын иһин, хас да киһини көрсөн ахтыылары ылбытым. Кинигэни кини аймаҕа, Дьокуускай куорат байыаннай комиссара Афанасий Захаровы кытта үлэлэһэн оҥордубут. Александр Никитич биһиги билэрбитинэн аҥардас Дьокуускай куоракка быһа холоон 200 эбийиэктэр тутууларыгар прорабтаан уонна салайан сыратын ууран туран үлэлээбит үтүөлээх киһи буолар. Мин сөҕөрүм диэн кини бэйэтэ өрөспүүбүлүкэбит киинигэр тутууга үлэлии сылдьан 15 сыл устата бэйэтэ бас билэр кыбартыырата суох этэ. Оннук сүрдээх сэмэй, бэйэтин туһугар көрдөһө сылдьыбат үтүө киһи Александр Никитич”, — диэн этэр автор Геннадий Тимофеевич.

Кинигэ тахсыыта бэрт түбүктээх, сыраны эрэйэр үлэ. Маныаха кини суруллуута эрэ буолбакка, тахсыыта эмиэ улахан оруоллаах. Манна Александр Никитич быраата, Афанасий Захаров сүүрэн-көтөн, төһүү күүс буолбутун бэлиэтииллэр. “Убайбыт бэйэтин кэмигэр элбэх тутууну ыытан кэлбит киһи буолар. Билигин сааһа 85 буолла. Кини туһунан дьон-сэргэ өссө үчүгэйдик биллин, сиэннэригэр, хос сиэннэригэр, кэннигэр хаалар ыччаттарыгар өйдөбүл буолан хааллын диэн санаанан салайтаран кинигэ таһаарарга санаа киирбитэ. Бэйэтигэр элбэх матырыйааллаах этэ. Убайбыт туппут тутуулара билигин да үлэлии тураллар. Ол курдук холобурдаан аҕаллахха, Бырабыытылыстыба 1-кы, 2- с дьиэлэрэ, “Силуэт” дьиэтэ, көтөр фабриката, мэрия дьиэтэ уонна да атын элбэх тутуулары кини прорабтаан, быһаччы кыттан туттарбыта”, — диэн кэпсиир Афанасий Павлович.

Үтүөлээх тутааччы төрөөбүт Абаҕатыгар бочуоттаах сынньалаҥҥа тахсан баран туттубут дьиэтигэр сайын аайы тахсан күһүн хойукка диэри олорор, сибиэһэй салгынынан тыынар. Кини тэлгэһэтин хара бастакыттан араас мастары олордон киэргэппитэ. Айылҕалын алтыһар буолан, тыаттан булбут дьикти мастарын киллэрэн, барытын туһаҕа таһаарар. Кини тэлгэһэтэ бэл өрөспүүбүлүкэ күрэҕэр кытта бастаан турар. “Урут эрдэ олус элбэҕи олордорум. Билигин сааһырдым. Үүнээйигэ үчүгэй көрүү-харайыы наада. Дьон кэллэҕинэ сүбэлээн-амалаан биэрэбин. Тыа салгына барахсан олус үчүгэй буоллаҕа”, — диэн этэр Александр Никитич.

Үтүө-мааны киһи, кини дьикти кэрэ тэлгэһэтин сиһилии “Амма олоҕо” хаһыакка ааҕан билсээрин.

Ааптар: Наталья Бубякина

Читать оригинал статьи и комментарии на Ulus.Media
$:66
:73
¥:94
$9907.55
в Якутске 24°
завтра 21°