Аммаҕа ытык саастаах дьон тыаҕа сир аһыгар сылдьаллар

11 августа 2019, 20:33

Аммаҕа саастаах дьон кырдьаҕаспыт диэн сууланан олорон кэбиспэттэр. Ойуурга сир аһыгар ытык саастаах кырдьаҕастарбыт эдэрдэри кытта тэҥҥэ сылдьаллар.


Сайыммыт барахсан бүтэһик ыйа ортолоон эрэр. Атырдьах ыйа биллэрин курдук элбэх сир аһын хомуйар ыйынан биллэр. Быйыл ый саҥатыгар сылаас күннэр тураннар, дьон тыаттан арахпат. Сир аһыттан бары сомсон хаалаары баҕараллар, кыһынын миньигэс барыанньа остуолларыгар турарыгар кыһаллаллар.

Соторутааҕыта тыаҕа сылдьан Бөтүҥ нэһилиэгин бочуоттаах олохтооҕун, 85 саастаах Афанасий Егорович Борисовы көрүстүм. “Маннык тыаҕа сылдьарбын сөбүлүүбүн. Соторутааҕыта Сэргэ Бэскэ баран сугуннаан кэлбитим. Нуотара үрэххэ баран балыктаан кэлбитим. Хаамтаххына этиҥ-сииниҥ чэбдигирэр. Хайа уонна тыа салгына диэн туох да үчүгэй буоллаҕа дии”, — диэн Афанасий этэр. Кини тыаны бэйэтин биэс тарбаҕын курдук билэр. Тоҕо диэтэр кадровой булчут буолан төһөлөөх килэмиэтири тайҕаҕа хаампытын бэйэтэ эрэ билэн эрдэҕэ. Кырдьаҕас аныгы кэми кытта тэҥҥэ хаамсан суотабай төлөпүөнүн илдьэ сылдьар. Төлөпүөнэ сотору-сотору тырылаан сиэннэр эһэлэрэ ханна баарын сураһаллар. Эһээ онно бэрт чуолкайдык эппиэттээн, моонньоҕон хомуйа сылдьарын кэпсиир.

Онтон Эмис нэһилиэгин ытык олохтооҕо, 83 сааһын томточчу туолбут, Октябрина Дмитриевна Захарова эмиэ сылы көтүппэккэ сир аһыгар оҕолорун, сиэннэрин кытта сылдьар. “Тыаҕа сылдьарбын олус сөбүлүүбүн. Кыһыны быһа бу кэммин күүтэбин. Саас ылан истэҕин аайы ыарахан буолар гынан баран, тыаҕа таҕыстым да хайдах эрэ чэпчээн хаалабын”, — диэн этэр Октябрина Дмитриевна. Кини тыаҕа таҕыстаҕына кураанах киирбэт. Эдэрдэри кытта сир аһа үүммүт эрэ буоллар, хоп курдук хомуйар.

Дьэ бу курдук кырдьаҕастарбыт барахсаттар, сууланан олорбокко, түгэн эрэ көһүннэр, күөх суугун тыаларыгар тахса тураллар. Кинилэр сир аһын хото хомуйар сыаллаах буолбакка, көннөрү сибиэһэй тыа салгынынан тыына, аар айылҕаҕа сынньана диэн буолар. Мантан эдэр дьон холобур эрэ ылыахтарын сөп.

Ааптар: Наталья Бубякина

Читать оригинал статьи и комментарии на Ulus.Media
$:66
:73
¥:94
$9913.41
в Якутске 24°
завтра 21°