Төрүт дойду хаһаайына - Остоолбо олохтооҕо Дмитрий Гуляев

14 августа 2019, 12:27

Остоолбо Улахан сыһыытыгар билигин 51-гэр сылдьар Дмитрий Сидорович Гуляев оҕо эрдэҕиттэн оттуур. Хоту дойду эр киһитин быһыытынан бултуур, балыктыыр уонна сүөһү, сылгы баайдаах чааһынай хаһаайыстыбалаах. Чөл олоҕу бэйэтин холобурунан эдэр ыччакка сырдатар. «Байанай», от «Күүлэйин», «Муус ылыытын» күрэхтэригэр куруук кыттар. Остоолбо эдэр дьоно аҕа саастаахтар үтүө холобурдарын батыһан от-мас үлэтигэр кыраларыттан сысталлар.


Дмитрий Гуляев төрүт бултуур ньымалары баһылаабыт, сиэри-туому билэр, үлэни кыайар, тупсаҕай тутуулаах, дуоспуруннаах кэпсээннээх Дьааҥы төрүт олохтооҕо. 2016 сыллаахха ыытыллыбыт оройуоннааҕы «Байанай күрэҕэр» бастаан МР саанан наҕаарадаламмыта. ДЭС маастара ыстаансыйаҕа үтүө суобастаах үлэтин иһин элбэх махтал суруктардаах, кырааматалардаах. Үтүө суобастаах үлэтин иһин «Сахаэнерго» ААУо 2014 сыллаахха ылбыт Бочуот кырааматата кини үлэҕэ бэриниилээҕин бигэргэтэр.

Аныгы кэм сиэринэн үлэ хаачыстыбатын үрдэтии үлэ араас эйгэтин ирдэбилэ буолан, Дмитрий Сидорович «Техническая эксплуатация и обслуживание электрического и электромеханического оборудования» диэн идэни эбии баһылыырга кэтэхтэн 4 кууруска үөрэнэ сылдьар. Устудьуон, икки игирэ уол эһээтэ үлэ, үөрэх үөһүгэр сылдьарыттан санаата бөҕөх «Үлэ диэн дьол», — диирэ олоҕу олус сөптөөх анаарыы.

Сир-дойду, нэһилиэк олоҕо хаһаайынтан тутулуктаах. Дмитрий нэһилиэк ааспыт ыҥырыылаах Сэбиэтин дьокутаата, баҕа өттүнэн баһаарынай дружина чилиэнэ. Дьааҥы сиригэр быйылгы ыксаллаах быһыыга кини баһаары умулларыыга түүннэри-күннэри үлэлээтэ. Сир ойуур баһаардарыттан умайан от үүнүүтүгэр мэһэйдэри үөскэттэ. Ол да үрдүнэн биригээдэлэр, биирдиилээн хаһаайыстыбалар бары күүһү окко уурдулар.

464 га иэннээх Улахан Сыһыыга сылын ахсын ыытыллар Күүлэй күрэҕэр улуус араас нэһилиэктэриттэн дьон көхтөөхтүк кыттар. «Уруккута бэрт уулаах сыһыы этэ. Сэбиэскэй саҕана манна биһиги звенобут оттооччу, наһаа уулаах сир буолааччы, уу сүүрэр ханаабата кытта оһон хаалбыт, ото үүммүт, хойуу», — диэн Дмитрий Сидорович сөҕө хайгыыр.

Улахан Сыһыы нэлэмэн ходуһатыгар үрдүк түстээх, кээһиилээх оттоох бу үтүө быйаҥнаах сир Остоолбо дьонугар үөһэттэн анаммыкка дылы. Хотуурунан охсууну ордорор Дмитрий Сидорович «Элбэх от оттоноро буоллар, кыстыгы этэҥҥэ туоруо этибит», — диир.

Ааптар: Боотто АСХААРАП

Читать оригинал статьи и комментарии на Ulus.Media
$:66
:73
¥:94
$9861.36
в Якутске 22°
завтра 23°