Аммаҕа Харитоновтар оҕуруот аһын хомууругар сылдьаллар

10 сентября 2019, 11:37

Аммаҕа үлэни өрө туппут Харитоновтар дьиэ кэргэн бэһис сылларын бааһынай хаһаайыстыба тэринэннэр оҕуруот аһын үүннэриитинэн дьарыктаналлар. Билигин хомуур үлэтигэр оскуола оҕолоро көмө буолаллар.


Амма сиригэр «Хойуу» учаастагар бааһынай хаһаайыстыбалаах Харитоновтар дьиэ кэргэн оҕуруот аһын бэһис сылын үүннэрэллэр. Быйыл 3 гектарга хортуоппуйу, 1 гектарга хаппыыстаны уонна 0,3 гектарга сүбүөкүлэни, 0,3 гектарга моркуобу үүннэрдилэр. Ампаар дьиэни көтүрэн ааҕалан, уот тартаран, оҥостон сайын устата үрдүттэн олорон хаһаайыстыбаларын дьаһайаллар. Сайын аайы биэстии оҕо, хомуур үлэтигэр оскуолалар дуогабар быһыытынан көмө буолаллар. Бу күннэргэ лицей уонна 1N-дээх оскуола үөрэнээччилэрэ үлэлээн эрэллэр. Биир күҥҥэ 60-70 оҕо 200 — чэкэ куул хортуоппуйу хомуйаллар.

Ыал ийэтэ Марфа Алексеевна «Хойуу» учаастага тэриллиэҕиттэн оробуочайынан, куруусчутунан, поварынан, тырахтарыыһынан, звеноводунан үлэлээбитэ. Дьокуускайдааҕы тыа хаһаайыстыбатын техникумун, Благовещенскайдааҕы тыа хаһаайыстыбатын институтун бүтэриэҕиттэн өр сылларга агрономунан үлэлээбитэ. Билигин бэйэлэрин хаһаайыстыбаларын сайыннараллар. Маныаха алта оҕолоро ким баарынан күүс, көмө буолаллар. Сиэттэр кэрэ айылҕалаах «эбээ», «эһээ» үлэлиир сирдэригэр күөххэ көҥүл оонньууллар. Харитоновтар ыал буолуохтарыттан ынах сүөһүнү тутан, бэйэ ыраас аһынан хааччынан олороллор, нэһилиэнньэ наадыйарынан үрүҥ астарын атыылаан кыралаан дохуоттаналлар. Марфа Алексеевна түбүктээх үлэтин таһынан Амматааҕа народнай тыйаатыр артыыската, «Айар абылаҥ» хоһоон айааччылар, «Арассыыйа ийэлэрэ» уопсастыбаннай, түөлбэ түмсүүлэрин көхтөөх кыттааччыта буолар. Ыал аҕа баһылыга Василий Иннокентьевич оскуолатын бүтэрээт, «Амма» сопхуоска үлэҕэ киирбитэ. Аармыйаҕа икки сыл сулууспалаабыта. Биир сиргэ 36 сыл тырахтарыыһынан үлэлээбитэ, оҕуруокка звеноводтаабыта, «Амма» биригээдэтигэр биригэдьиирдээбитэ. Онон сопхуос бары үлэтигэр сылдьыбыт, үлэни — хамнаһы иһиттэн билэр улахан уопуттаах киһи.

«Уруккуттан үлэлээбит сирбитигэр «Хойуу» учаастагар бэйэбит сөбүлүүр дьыалабытын тэринэн үлэлии -хамсыы олорорбутуттан астынабыт. Үлэлиир усулуобуйабытын, уу ыстарар тэрилбитин тупсаран иһиэхпит. Ааспыт дьылга нэһилиэнньэҕэ хаппыыста тиийбэтэҕэ, онон хаппыыста үүннэрэр баҕалаахпыт,» — диэн хаһаайыстыба баһылыга Василий Иннокентьевич санаатын үллэстэр.

Харитоновтар туһунан «Амма олоҕо» хаһыат кэлэр нүөмэригэр ааҕыҥ.

Ааптар: Алтана Артемьева

Читать оригинал статьи и комментарии на Ulus.Media
$:64
:71
¥:90
$10235.9
в Якутске
завтра