Догдоҥоҕо Манчаары хоһууннара күрэхтэстилэр

9 октября 2019, 16:38

Алтынньы 6 күнүгэр Манчаары Баһылай төрөөбүт төрүт сиригэр, Улуу Кыайыы 75 сылын көрсө, Манчаары Баһылай 215, Догдоҥо оскуолата 75 сылларыгар анаан эр хоһууннар күрэхтэстилэр. Тэрээһин аҕалар түмсүүлэрин салайааччыта Иван Пивоваров, «Байанай» түмсүү салайааччыта Виктор Черемкин, оскуола дириэктэрэ Иван Филиппов, нэһилиэк баһылыга Иван Новгородов көҕүлээһиннэринэн буолла.


Күрэхтэһээччилэр эстэпиэтэҕэ араас мэһэйдэри туорааһыҥҥа, сыал ытыытыгар, остоолбоҕо ыттыыга, аптамаат сааны хомуйууга, кутааны оттууга куоталастылар. Олохтоохтор кыттааччылар сүргэлэрин көтөҕөн, эр санаалара күүрэн бэркэ күрэхтэстилэр. «Манчаары эр хоһууна» анал ааты, ол эбэтэр бастакы миэстэни Эрэл Никифоров ылан, аптамаат саа сэртипикээтинэн наҕараадаланна. Иккис миэстэҕэ «Байанайдаах булчут» аатын Артур Карамзин ылан, 10000 солкуобайдаах эрэһиинэ тыы сэртипикээтин тутта. Үһүс миэстэ Арнольд Иванов буолла уонна Сунтаар улууһа туруорбут 5000 солкуобайдаах харчынан бириэмийэтин ылла. Төрдүс миэстэни Эрилик Никифоровка туттардылар, итиэннэ 2000 солкуобайдаах М.Д.Лукина туруорбут сэртипикээтин биэрдилэр.

Хас биирдии түһүмэххэ кыттан кыайбыттарга анал бириистэр туруорулуннулар. Бу күрэхтэһиигэ успуонсардаабыт дьоммутугар, «Сунтаар-79» оскуоланы бүтэрбиттэргэ уонна тэрийээччилэргэ махталбытын аныыбыт.

Ааптар: Светлана ГОГОЛЕВА.

Читать оригинал статьи и комментарии на Ulus.Media
$:64
:71
¥:90
$8210.48
в Якутске -7°
завтра -3°