Амма Чакырыгар олорор Кириллиннэр дьиэ кэргэн - бэтэринээр быраастар

9 октября 2019, 17:32

Амма улууһугар ветеринарнай сулууспа тэриллибитэ 95 сыла туолбутунан бэтэринээр быраас идэлээх дьон чиэстэнэллэр. Биир оннук дьиэ кэргэнинэн Чакырга олорор Кириллиннэр буолаллар.


Чакыр нэһилиэгэр олорор Кириллиннэр бэтэринээр быраас идэлээх дьиэ кэргэнинэн биллэллэр. Ыал аҕа баһылыга Павел Николаевич Лээги нэһилиэгэр холкуостаах дьиэ кэргэнигэр төрөөбүтэ. 1975 сыллаахха СГУ тыа хаһаайыстыбатын факультетыгар үөрэнэн бэтэрэнээр быраас идэтин ылбыта. Үлэтин Уус Маайа сопхуоһугар кылаабынай бэтэринээр бырааһынан саҕалаабыта. Онтон «Амма» сопхуос Чакырдааҕы отделениетыгар ыстаарсай бэтэринээр бырааһынан, «Амма» сопхуос, улуус кылаабынай бэтэринээр бырааһынан үтүө суобастаахтык үлэлээбитэ. Үчүгэй көрдөрүүлээх үлэтинэн Чакыр нэһилиэгэр сэбиэт бэрэссэдээтэлинэн, салгыы улуус салалтатыгар хаачыстыба уонна оҥорон таһаарар салаа начаалынньыгынан, бэтэринээр салалтатын сүрүннүүр исписэлииһинэн, кэлин Чакырга бэтэринээринэн уонна исписэлииһинэн үлэлээбитэ. Билигин ветеринарнай сулууспа, үлэ бэтэрээнэ буолан бочуоттаах сынньалаҥҥа олорор, кэтэх хаһаайыстыбатын дьаһайар, кэргэнинээн Тамара Николаевналыын сиэннэрин көрсөллөр. Кыыстара Татьяна Павловна СГУ медицинскэй институтун бүтэрэн Покровка участковай балыыһатын сэбиэдиссэйинэн үлэлиир, икки оҕо ийэтэ.

Павел Николаевич уола Николай Павлович аҕатын туйаҕын хатаран эмиэ бэтэринээр быраас идэтин талбыта. 1998 сыллаахха Чакырга бэтэринээр бырааһынан, 2003 сыллаахха улууска сыстыганнаах ыарыы салаатын сэбиэдиссэйинэн үлэлээбитэ. Бу кэмҥэ Николай Амматааҕы ветеринарнай лаборатория лаборанынан үлэлиир Амма Наахараттан төрүттээх Мариялыын ыал буолан 2007 сыллаахха дойдуларыгар Чакырга тахсыбыттара. Николай бэтэринээр учаастагын сэбиэдиссэйинэн, Мария бэтэринээр фельдшеринэн ананан таһаарыылаахтык үлэлээбиттэрэ. Мария Александровна 2003 сыллаахха тыа хаһаайыстыбатын техникумун «туйгуннук» бүтэрэн уонча сыл чинчийэр лабораторияҕа паразитология, токсикология салаатын лаборанынан үлэлээбитэ, тэрилтэ олоҕор көхтөөхтүк кыттара. 2004 сылга Дьокуускай куоракка агропромышленнай комплекс «Урожай» спартакиадаларыгар, 2011 сыллаахха ветеринария департаменын волейболга хамаандатыгар кыттан бириистээх миэстэҕэ тиксибиттэрэ. Аммаҕа ыытыллыбыт кийииттэр күрэхтэһиилэригэр кыайыылааҕынан тахсыбыта. Үөрэҕин үрдэтинэн тыа хаһаайыстыбатын судаарыстыбаннай академиятыгар кэтэхтэн бэтэринээр быраас идэтигэр үөрэнэн 2010 сыллаахха «туйгуннук» бүтэрбитэ. Мария бэтэринээр быраас дуоһунаһыгар ананаат бастакы өрөспүүбүлүкэтээҕи бэтэринээр быраастар күрэхтэһиилэригэр кыттан кыайыылаах буолан «Бастыҥ идэлээх» ааты ылан Турцияҕа путевканан наҕараадаланан кэргэнинээн сынньанан кэлбиттэрэ. Мария Александровна 2014 сылтан оскуолаҕа биология, химия учууталынан үлэлиир. Түөрт оҕолоох Кириллиннэр үлэни өрө туппут, олоххо көхтөөх ыал.

Павел Николаевич бииргэ төрөөбүт убайын Николай Николаевич төрөппүт кыыһа Анжелика Степанова — эмиэ ситиһиилээх бэтэринээр быраас. Чакыр аҕыс кылаастаах оскуолатын бүтэрэн баран Төҥүлүтээҕи СПТУ — га үөрэнэн бэтэринээр фельдшер идэтин ылбыта. Салгыы Дьокуускайдааҕы тыа хаһаайыстыбатын институтун бүтэрэн 2001 сылтан Өлүөхүмэтээҕи ветеринарнай салалтаҕа сүрүн исписэлииһинэн үлэлээбитэ. 2012 сылтан Өлүөхүмэтээҕи ветеринарнай чинчийэр лаборатория дириэктэринэн ананан күн бүгүнүгэр диэри үлэлиир, ыал тапталлаах ийэлэрэ уонна эбээтэ буолар. «СӨ ветеринарнай сулууспатын туйгуна», «Улахан бэтэринээр кириэһэ» бэлиэлэринэн, «Өр сыллаах үлэтин иһин» мэтээлинэн наҕараадаламмыта.

Кириллиннэр тустарынан «Амма олоҕо» хаһыат кэлэр нүөмэригэр сиһилии ааҕаарыҥ.

Ааптар: Алтана Артемьева

Читать оригинал статьи и комментарии на Ulus.Media
$:64
:71
¥:90
$8201.67
в Якутске -7°
завтра -6°