Майаҕа кырдьаҕастар дэкээдэлэрэ сэргэхтик ааста

9 октября 2019, 19:42

Мэҥэ Хаҥалас улууһугар аҕам саастаахтар дэкээдэлэрэ бэрт тэрээһиннээхтик ааста. Алтынньы 9 күнүгэр Д.Ф.Ходулов аатынан норуот айымньытын дьиэтигэр нэһилиэктэр кырдьаҕастара мустаннар «төгүрүк остуол» тула кэпсэттилэр, күһүҥҥү соҕутуопкалар быыстапкаларыгар, көрдөөх куонкурустарга кытыннылар, кэнсиэр көрөн сэргэхсийдилэр.


Бэтэрээннэр сэбиэттэрин бэрэссэдээтэлэ Маргарита Максимова киирии тылы этэн, эҕэрдэтин тиэртэ. «Олох көмүс күһүнэ» диэн ааттаах «төгүрүк остуолга» оройуон Сэбиэтин бэрэссэдээтэлэ Павел Сазонов, нэһилиэнньэ социальнай харысхаллаах буолуутугар управление начаалынньыга Иван Шестаков, култуура уонна духуобунай сайдыы управлениетын салайааччыта Дмитрий Аргунов, улуус кылаабынай бырааһын солбуйааччы Мида Колесова, биэнсийэ пуондатын управлениетын салайааччыта Альбина Григорьева, социальнай страхование сүрүннүүр исписэлииһэ Наталья Андреева, ыччат бэлиитикэтин управлениетын начаалынньыга Ирина Назарова, физкултуура уонна успуорт управлениетын начаалынньыга Константин Захарова, Р.Г.Васильев аатынан кыраайы үөрэтэр мусуой дириэктэрэ Зоя Шарина уонна «Майа сэлиэнньэтэ» МТ баһылыга Дмитрий Назаров кырдьаҕастар туруорбут ыйытыыларыгар хоруйдаатылар.

Аҕам саастаах дьон үксүн доруобуйа харыстабылын тиэмэтигэр интэриэһиргиир ыйытыыларын биэрдилэр. Элбэх боппуруос биэнсийэ пуондатыгар итиэннэ социальнай харысхал эйгэтигэр туһаайылынна. Босхо ырысыап, улууска бырааһынан хааччыллыы, ыарыыны кэмигэр сөптөөхтүк булуу, кырдьаҕастарга дьиэ өрөмүөнүгэр үбүнэн көмөлөһүү, куруорт сонотуоруй путевкатынан хааччыйыы о.д.а. ыйытыылар иһилиннилэр. Мустубут аҕам саастаахтар толору ыйытыылары ыланнар, астыннылар. Бырааһынньык үөрүүлээх чааһыгар управление салайааччылара бастыҥ үлэлээх-хамнастаах уопсастыбанньыктары бэлиэтээтилэр, бэлэхтэрин туттардылар.

Тэрээһин чэрчитинэн сиэдэрэй сэлээппэни көрдөрүүгэ, частушка этиигэ, күһүҥҥү минньигэс бүлүүдэҕэ күөн көрсүстүлэр.

Ааптар: Виктория БЕЛОЛЮБСКАЯ.

Читать оригинал статьи и комментарии на Ulus.Media
$:64
:71
¥:90
$8202.08
в Якутске -7°
завтра -6°