Кыайыы Знамята Муомаҕа кэллэ

19 октября 2019, 17:07

Алтынньы 18 күнүгэр Муома оройуонун Хонуу бөһүөлэгэр үөрүүлээх күн үүннэ. Бу күн Кыайыы болуоссатыгар ыраахтан музыка дьиэрэйдэ, үгүс киһи, оҕо-аймах муһунна.


Болуоссакка Российскай Федерация уонна Саха сирин гимнэрэ доргуччу тыаһаабыттарын кэннэ, Муома оройуонун баһылыга И.П. Павлов, Муома национальнай нэһилиэгин баһылыга А.В. Андреев уонна Аҕа дойду сэриитин кыттыылааҕа, оройуон бочуоттаах гражданина, сэрии, тыыл, үлэ ветерана Иван Андреевич Петров олохтоохтору Улуу Кыайыы 75 сыла чугаһаабытынан, Муома оройуонугар Кыайыы Знамята кэлбитинэн итиитик-истиҥник эҕэрдэлээтилэр. Иван Петрович бэйэтэ сэрии ветеранын Петр Иванович Павлов уола буоларын долгуйа аҕынна, оттон Иван Андреевич сэрии ыар кэмнэрин ахтан-санаан ааста.

Ити кэнниттэн үөрүүлээх быһыы-майгы ортотугар болуоссакка Кыайыы Знамята киллэрилиннэ. Знамяны бэрээдэги араҥаччылыыр полиция үлэһиттэрэ тутан аҕаллылар, үөһэ сыана үрдүгэр таһаардылар.

Эҕэрдэ тылы оройуон ветераннарын сэбиэтин председателэ Е.И. Слепцова, ыччат оройуоннааҕы салаатын специалиһа Л.С. Слепцова ыллылар, Иван Андреевиһы, мустубут дьону долгутуулаах түгэнинэн эҕэрдэлээтилэр. «Осикат» этно-культурнай киин үлэһиттэрэ сэрии кэмнэриттэн композицияны толордулар.

Салгыы сэрии ветерана И.А. Петров, И.П. Павлов, А.В. Андреев уонна Е.И. Слепцова Аҕа дойду сэриитин кыттыылаахтарын обелискаларыгар венок уурдуллар. Кыайыы Знамятын көрсүү сиэрэ-туома уопсай хаартыскаҕа түһүүнэн түмүктэннэ.

Улуу Кыайыы 75 сылын көрсө биһиги республикабытыгар Кыайыы Знамятын улуустарынан тириэрдии Горнай улууһуттан саҕаламмыта. Онтон бу алтынньы 18 күнүгэр Муома оройуонугар Өймөкөөнтөн кэллэ. Кыайыы Знамятын Муомаҕа тэрилтэлэргэ, оскуолаларга илдьэ сылдьыахтара. Салгыы эстафетаны Муоматтан Үөһээ Халыма оройуона тутуоҕа, Кыайыы Знамята онно илдьиллиэҕэ.

Ааптар: Т. СЛЕПЦОВА.

Читать оригинал статьи и комментарии на Ulus.Media
$:64
:71
¥:91
$7883.94
в Якутске -31°
завтра -30°