Муомаҕа үөрэхтээһин төрүттэммитэ 90 сыла

8 ноября 2019, 17:07

Быйылгы 2019-2020 үөрэх дьылыгар Муома үөрэҕин салаатыгар улахан тэрээһин буолуо турар. Оройуоҥҥа үөрэхтээһин төрүттэммитэ 90 сыла. Бу кэрэ-бэлиэ, дьоһун, ытык саас улуус олохтоохторугар барыларыгар даҕаны улахан суолталаах.


Үөрэх оройуоннааҕы управлениетын салайааччыта Татьяна Дмитриевна Андреева бэлиэтээбитинэн, быйыл 2019 с. уонна эһиил 2020 с. араас дьаһаллар тиһигин быспакка ыыттыллыахтара. Билигин оскуолаҕа киириэх иннинээҕи оҕо тэрилтэлэригэр Хаачыстыба эстафетата бара турар.

Эстафета «Кэнчээри» уһуйаантан саҕаламмыта. Республика күнүгэр детсад сэбиэдиссэйигэр Н.Н. Жирковаҕа эстафета эмблемата туттарыллыбыта. Бары билэрбит курдук, бу детсад уруккута Муома орто оскуолата этэ. Сүүрбэһис үйэ бастакы аҥарыгар уонна ортотугар бу оскуолаҕа билиҥҥи аҕам саастаахтар көлүөнэлэрэ үөрэммитэ. Онон Хаачыстыба эстафетата ити уһуйаантан саҕаламмыта бэйэтэ ураты өйдөбүллээх.

Хаачыстыба эстафетата салгыы Муома национальнай нэһилиэгин уһуйааннарыгар «Теремокка», «Чуораанчыкка» уонна Улахан Чыыстай «Ньургуһун» уһуйааныгар ыытылынна. Манна тустаах күннэринэн иитээччилэргэ лекциялар, аһаҕас дьарыктар буоллулар итиэннэ төрөппүттэргэ «Аһаҕас ааннар» тэрилиннилэр. Аныгыскы нэдиэлэҕэ оскуолаҕа киириэхтэрин иннинээҕи саастаах оҕолору иитии хаачыстыбатын эстафетата Хонууга «Сказка» детсадка түмүктэниэҕэ.

Онтон эстафета уопсай үөрэхтээһин оскуолаларыгар уонна эбии үөрэх тэрилтэлэригэр салгыы барыаҕа, эмблемата тэрилтэлэринэн туттарыллан иһиэҕэ.

Муома оройуонугар үөрэхтээһин 90 сылын бэлиэтээһин сүрүн тэрээһиннэрэ эһиил 2020 с. буолуохтара. Ол курдук тохсунньуга Дьокуускайга, Төбүлэххэ, Улахан Чыыстайга дьаһаллар ыытыллыахтара. Куоракка араас сылларга Муома оройуонун оскуолаларыгар, уһуйааннарыгар үлэлээбит педагогтары, педагогическай үлэ ветераннарын кытта көрсүһүүлэр буолуохтара.

Итини тэҥэ үгэскэ кубулуйбут үөрэх үлэһиттэрин Спартакиадалара эмиэ тохсунньу ыйга ыытыллыаҕа. Олунньуга бастыҥ учууталлар уонна иитээччилэр парадтара буолуоҕа.

Бу улахан датаҕа сөп түбэһиннэрэн Муомаҕа үөрэхтээһин сайдыытын туһунан кинигэ тахсаары сылдьар. Манна араас кэмҥэ үөрэммит оҕолор, үлэлээбит педагогтар матырыйааллара, ахтыылара хомуллан киирдилэр. Кулун тутарга кинигэ презентацията ыытыллара былааннанар.

Бу күннэргэ үөрэх тэрилтэлэрин салайааччылара түмсэн инники торумнары ырытыстылар, үөрэхтээһин хаачыстыбатын тупсарыыга, үбүлүөйү тэрийиигэ былааннары дьүүллэстилэр. Түгэнинэн туһанан, Муома улууһун олохтоохторун, педагогтары быйылгы үөрэх 2019-2020 сс. дьылыгар бэлиэтэнэр үөрэхтээһин 90 сылынан итиитик-истиҥник эҕэрдэлиибит. Биһиги үөрэхтээх, билиилээх дьон буоларбытыгар тугунан да кэмнэммэт үтүөлээх күндү иитээччилэрбитигэр, учууталларбытыгар барҕа махталбытын этэбит.

Ааптар: Т. СЛЕПЦОВА.

Читать оригинал статьи и комментарии на Ulus.Media
$:64
:71
¥:91
$7030.14
в Якутске -33°
завтра -33°