Сунтаарга дьиҥ чахчыларга олоҕурбут сонун кинигэни сүрэхтээтилэр

8 ноября 2019, 18:07

Л.А.Попов аатынан Сунтаар улууһун киин бибилэтиэкэтин ааҕар саалатыгар СӨ култууратын үтүөлээх үлэһитэ, норуот үөрэҕириитин туйгуна Марфа Христофоровна Конобулова алмаас таас хостонуутун туһунан ураты ааттаах «Совершенно секретно» диэн саҥа кинигэтин сүрэхтэниитэ буолла.


Билэрбит курдук аан бастакы алмааһы Кириэстээх Соколинайыгар Г.Х.Файнштейн салайааччылаах Амакинскай экспедиция булбута. Сунтаар улууһун биир киэн туттар энтузиаст киһитэ Марфа Христофоровна Конобулова сир ураты баайын көрдөөһүнүгэр маҥнайгы геологтар, олохтоох сирдьиттэр араас дьылҕалара, кинилэр сыралара, ааттара умнууга хаалбатын курдук үйэтитиигэ ис сүрэҕиттэн ылсан үлэлиир.

Кини 1978 сылтан саҕалаан ыарахан усулуобуйаҕа, уустук кэмҥэ, бырамыысыланнас сайдыытыгар чопчу сыһыаннаах дьон ахтыыларын хомуйууга үлэлэһэр. Кинигэҕэ Москва, Питер, Львов, Новосибирскай, Иркутскай куораттарынан сылдьан хомуйбут үлүгэрдээх элбэх матырыйаалын, историческай чахчылары киллэрэн, олус интэриэһинэй кинигэни 300 ахсаанынан таһааттарда.

Кинигэ сүрэхтэниитигэр кэлбит үрдүкү кылаас оҕолоругар туһаайан М.Х.Конобулова: «Бэйэтин историятын билбэт киһи билигин сатаан олорбот, сарсыҥҥыта туманнаах курдук, билэр эрэ буоллаххытына сайдыаххыт, сарсыҥҥы күҥҥэ эрэллээх буолуоххут. Олоххутугар көрсөр хас биирдии дьоҥҥутуттан бэйэҕитигэр туһалааҕы иҥэринэн, билиигитин-көрүүгүтүн хаҥатан-байытан иһиҥ!» — диэн этэр. Саҥа буруолуу сылдьар «Совершенно секретно» диэн күүстээх ааттаах кинигэ киин бибилэтиэкэҕэ 500 солкуобайга бу күннэргэ атыыга баар.

Ааптар: Юлия АЛЕКСЕЕВА.

Читать оригинал статьи и комментарии на Ulus.Media
$:64
:71
¥:91
$7139.67
в Якутске -33°
завтра -33°